Semeytany.kz — Семей қаласында Абай облысы полиция департаментінің мамандарына 137 қызметтік автокөліктің кілті салтанатты түрде тапсырылды. Іс-шараға облыс әкімі Берік Уәли мен полиция департаментінің бастығы Эльдар Данияров қатысты.
Жаңа техникалар қатарында KIA Cerato, Elantra, JAC және Cobalt маркалы автокөліктер бар. Сонымен бірге полиция қызметіне 8 автобус берілді. Бұл қадам құқық қорғау органдарының материалдық-техникалық базасын күшейту бағытындағы жүйелі жұмыстың жалғасы саналады.
Салтанатты жиында сөз сөйлеген аймақ басшысы Берік Уәли полиция қызметкерлеріне қойылатын талап жоғары екенін атап өтті. Оның айтуынша, тәртіп сақшыларының жедел әрекет етуі, жақсы жабдықталуы және тиімді жұмыс істеуі – азаматтардың қауіпсіздігін қамтамасыз етудің негізгі кепілі.
Облыс әкімі бұл жолғы көлік тапсыру шарасы тек автопаркті жаңарту емес, қоғамдық қауіпсіздікті күшейтуге бағытталған нақты шешім екенін айтты. Сондай-ақ алдағы уақытта облыс орталығы мен аудандарда жедел басқару орталықтарын салу, радиостанциялар мен қосымша көліктер алуға қаражат бөлу жоспарланып отырғанын жеткізді.
Айта кетейік, былтыр жергілікті атқарушы органдар тарапынан полиция департаментінің материалдық-техникалық базасын нығайтуға және арнайы техникалық құралдар сатып алуға тиісті қаржы бөлінген болатын. Соның нәтижесінде биылғы алғашқы үш айда өңірдегі құқық бұзушылықтар саны өткен жылдың осы кезеңімен салыстырғанда 18 пайызға азайған. Ал қоғамдық орындарда тіркелген құқық бұзушылықтар 246-дан 184-ке дейін төмендеген.
