Semeytany.kz — Абай облысында жазғы демалыс маусымына дайындық және туристік аймақтардың инфрақұрылымын жетілдіру мәселелері кеңейтілген аппараттық кеңесте қаралды. Жиынға облыс әкімі Берік Уәли төрағалық етті.
Кеңес барысында демалыс орындарының қазіргі дайындығы, туристік бағыттарды дамыту, сондай-ақ өңірді таза ауыз сумен қамту жобаларының орындалу барысы талқыланды. Отырысқа облыстық басқармалар мен департаменттердің басшылары қатысып, аудан және қала әкімдері бейнебайланыс арқылы қосылды.
Күн тәртібіндегі мәселелер бойынша туризм басқармасының басшысы Бекжан Бапышев, Мақаншы, Бесқарағай, Абай аудандарының әкімдері және энергетика және тұрғын үй-коммуналдық шаруашылық басқармасының басшысы Раджан Сейтқанов баяндама жасады.
Өңірдегі негізгі туристік бағыттардың бірі саналатын Алакөл жағалауында ауқымды жұмыстар қолға алынған. Қазіргі уақытта бас жоспарға өзгерістер енгізу басталып, аумақ көлемін 300 гектардан 3000 гектарға дейін ұлғайту көзделіп отыр. Сонымен қатар 2026-2028 жылдарға арналған туризмді дамыту жол картасы бекітіліп, оған 43 іс-шара енгізілген.
Жағалаудағы инфрақұрылымды жақсарту үшін 3 шақырым аумақта жағалауды нығайту, электр тапшылығын азайту үшін жаңа желілер мен қосалқы станциялар салу, тұрмыстық қалдықтар полигонын орналастыру, су және кәріз жүйелерін тарту жоспарланған. Туристердің қауіпсіздігі үшін өрт сөндіру депосы салынды. Бұдан бөлек, жағалауға жасанды интеллект жүйесімен байланыстырылған 137 бейнебақылау камерасын орнату көзделген. Сондай-ақ абаттандыру, жарықтандыру, жаяу және веложолдар салу, санитарлық нысандар орналастыру жұмыстары жүргізіледі.
Туризм саласын жүйелі дамыту мақсатында облыста «VISIT ABAI» коммуналдық мемлекеттік мекемесі құрылған. Енді өңірдегі туристік орындар «Abai Travel» мобильді қосымшасы мен VISITABAY.KZ платформасына біріктірілмек. Бұл келушілерге брондау, бағытты анықтау және қажетті ақпарат алуды жеңілдетеді.
Бесқарағай ауданындағы Шипалы көлінің маңында да ірі жоба жоспарланып отыр. Емдік суы мен балшығына негізделген емдеу-сауықтыру туризмін дамыту үшін 2026-2028 жылдары 4 миллиард теңге инвестиция тартылып, балшықпен емдеу орталығы, санаторий және демалыс аймағы салынбақ.
Абай ауданында «Taukum Жидебай» этно-кешені кезең-кезеңімен жүзеге асырылып жатыр. Қазір инженерлік желілер тарту және аумақты абаттандыру басталған. Жыл соңына дейін бұл жерде «Сақ» моншасы, глемпинг және тұрғын үйлер салу жоспарланған.
Жиында облыс әкімі тиісті басқармалар мен аудан әкімдеріне Алакөл мен оған жақын аумақтардағы инженерлік және туристік инфрақұрылым жұмыстары уақытылы аяқталуы керектігін айтты. Сонымен бірге Шипалы көлінің маңындағы жол, электр және санитарлық жүйелерді ретке келтіру міндетін жүктеді.
Кеңесте ауыз сумен қамту мәселесі де көтерілді. Энергетика және тұрғын үй-коммуналдық шаруашылық басқармасының мәліметіне сәйкес, облыста бұл бағытта 32 жоба іске асырылып жатыр. Оның 21-інде құрылыс аяқталған.
Облыс әкімі қала және аудан әкімдеріне сумен қамту нысандарын белгіленген мерзімде іске қосуды, құрылыс сапасын күнделікті бақылауда ұстауды және жұмыстардың кешікпей аяқталуын қамтамасыз етуді тапсырды.
