Semeytany.kz – Абай облысында өңірді жылу және электр қуатымен тұрақты қамтамасыз ету мақсатында бірқатар ірі инфрақұрылымдық жобалар іске асырылмақ.
Бұл туралы облыс әкімі Берік Уәли Үкімет отырысында баяндап, өңірдегі энергетика саласын дамыту бағытындағы жоспарлармен бөлісті.
Аймақтың көмірге деген жалпы қажеттілігі 1 млн 247 мың тоннаны құрайды. Өңірдегі негізгі көмір өндіруші кәсіпорын – Қаражыра кен орнында жұмыс істейтін «Қаражыра» акционерлік қоғамы. Кәсіпорынның өнеркәсіптік қоры 780 млн тоннаға жетеді, ал республикадағы жалпы көмір өндірісіндегі үлесі шамамен 8 пайызды құрайды.
Өткен жылы кәсіпорын 34 млрд теңгеге 6,9 млн тоннадан астам көмір өндіріп, тек облысты ғана емес, өзге өңірлерді де қамтамасыз еткен. Биыл 57,9 млрд теңгеге 8,2 млн тонна көмір өндіру жоспарланып отыр. Ал 2029 жылдан бастап өндіріс көлемін жылына 14,2 млн тоннаға дейін жеткізу көзделген. Сонымен қатар 2041 жылға дейін 121 млрд теңге инвестиция салу жоспары бар.
Өңірді жылумен және электр энергиясымен тұрақты қамтамасыз ету үшін Семей қаласында үшінші жылу электр орталығын салу жоспарланған. Оның жылу қуаты 1000 гигакалория, ал электр қуаты 360 мегаватт болмақ. Құрылыс жұмыстары биыл басталып, 2029 жылдың соңына дейін аяқталады деп күтілуде.
Курчатов қаласында да қуаты 700 мегаватт болатын конденсациялық электр станциясы салынбақ. Жоба екі кезеңмен жүзеге асады: 2026-2029 жылдары 350 мегаватт, ал 2029-2030 жылдары тағы 350 мегаватт қуат іске қосылады.
Сонымен қатар Курчатовта көмір-химия өндірісін дамыту бағытында ірі жоба қарастырылып жатыр. Онда жылына 300 мың тонна аммиак және 520 мың тонна карбамид өндіретін кешен салу жоспарланған. Жобаны 2026-2029 жылдары жүзеге асыру көзделген.
Қазіргі таңда бұл бастамалар өңірдегі электр энергиясының қауіпсіздігін арттыруға, қуат тапшылығын азайтуға және әлеуметтік-экономикалық дамуға серпін беруге бағытталған.
