Семей қаласындағы медициналық мекемелердің жұмысы, жаңа бөлімшелердің ашылуы және дәрігерлердің біліктілігін арттыру мәселелері БАҚ өкілдеріне арналған баспасөз турында айтылды. Шара Абай облысының денсаулық сақтау басқармасы мен Өңірлік коммуникациялар қызметінің қолдауымен өтті.
«МУС» КеАҚ университеттік госпиталінің педиатрия жөніндегі директордың орынбасары Дулат Каримовтың айтуынша, балалар стационары 150 орынға арналған.
– Аурушаңдық артқан кезде қосымша 20 төсек-орын ашуға мүмкіндігіміз бар. Ғимарат 1972 жылы салынған. Бүгін стационар облыстық балалар ауруханасының қызметін атқарады. Мұнда хирургиялық, неврологиялық және жарақат алған балалар ем қабылдайды. Облыстың бас штаттан тыс мамандары да осы жерде жұмыс істейді, – деді ол.
Сонымен қатар биыл мекемеде госпитальдық фармация бөлімін ашу жоспарланған.
– Балалар стационарында екі қабылдау бөлімі жұмыс істейді. Күн сайын шамамен 150 бала жүгінеді. 2025 жылы 28 орындық балалар травматологиясы бөлімшесі ашылды. Биыл госпитальдық фармация енгізіледі. Бұл дәрілерді орталықтандырылған түрде таратуға мүмкіндік береді, адам факторын азайтып, тиімділікті арттырады, – деді Дулат Каримов.
Жедел медициналық жәрдем ауруханасының директоры Ерсін Сәбитов мекемеде төсек-орындардың басым бөлігі тұрақты түрде пайдаланылатынын атап өтті.
– Клиника 2013 жылы пайдалануға берілген. Мұнда кардиология, гематология, хирургия, травматология, урология бөлімшелері жұмыс істейді. Сонымен қатар оңалту қызметтері көрсетіледі. Жылына 18 мыңнан астам адам ем алады. 375 төсек-орынның шамамен 90 пайызы тұрақты түрде толы, – деді ол.
Оның айтуынша, медицина қызметкерлерінің біліктілігін арттыруға ерекше көңіл бөлінеді.
– Қызметкерлер үшін тұрақты түрде оқу курстары мен шеберлік сабақтары ұйымдастырылады. Биыл Нагасаки қаласынан маман келіп, ортопедия және травматология бағытында оқыту өткізді. Екі науқасқа операция жасалып, олар сәтті шығарылды, – деді Ерсін Сәбитов.
Жедел медициналық жәрдем ауруханасы директорының емдеу ісі жөніндегі орынбасары Айбол Маралбаевтың айтуынша, госпитальдық фармацияға көшу қауіпсіздік пен тиімділікті арттырады.
– Бұл жүйе дәрілерді үнемдеуге мүмкіндік береді. Әр науқас өзіне қажетті дәріні нақты алады. Дәрілер арнайы бөлмеде дайындалып, стерильді түрде қапталып, жеке нөмірмен жеткізіледі. Бұл қауіпсіздікті күшейтіп, жоғалту қаупін азайтады, – деді ол.
Сонымен қатар бұл тәсіл дәрілік заттардың айналымын бақылауды күшейтіп, оларды дұрыс мөлшерлеуге мүмкіндік береді.
