Абай облысында «AMANAT» партиясының «TURGYNDAR AMANATY» жобасы аясында «Үйді басқару: жауапкершілік, сенім, нәтиже» тақырыбында облыстық форум өтті. Іргелі іс-шара тұрғын үй-коммуналдық шаруашылығы саласындағы өзекті мәселелерді талқылап, тиімді шешімдер қабылдауға бағытталған ашық пікір алмасу алаңына айналды.
Өз кезегінде, «AMANAT» партиясының Хатшысы Ержан Жылқыбаев аталған жобаның негізгі мақсатына тоқталды.
«AMANAT» партиясы көппәтерлі тұрғын үйлерге қатысты өзекті мәселелерді шешуді көздейтін «TURGYNDAR AMANATY» жобасын қолға алуда. Бүгінде Абай облысында тұрғын үй қоры кеңейіп, тұрғын үй-коммуналдық шаруашылығы саласы жүйелі түрде дамып келеді. Өңірде 2 084 көппәтерлі тұрғын үйдің 734-і кондоминиум ретінде тіркелген, ал қалғандары бойынша тіркеу жұмысы жалғасуда. Соңғы үш жылда 122 көппәтерлі тұрғын үй пайдалануға берілді. Ең бастысы, жұмыс тұрғындармен кері байланысты күшейтуге бағытталуы қажет. Себебі МИБ және ПИК төрағалары тұрғындармен тікелей жұмыс істеген соң, нақты мәселелерді жақсы біледі. Сондықтан олардың ұсыныстары саланы дамыту ісінде маңызды рөл атқарады», – деді ол.
Айта кетейік, жыл басынан бері осындай форум-семинарлар Қарағанды, Ақмола, Павлодар, Түркістан және Шығыс Қазақстан облыстарында өткізіліп, оң нәтиже көрсетті.
«AMANAT» партиясы аталған жоба аясында МИБ және ПИК төрағаларына арналған «OSI-SKILLS» оқыту семинарларын ұйымдастыру, басқару жұмысын үйлестіретін қалалық кеңестер құру, депутаттардың тұрғындар алдында есеп беру жүйесін енгізу, әкімдіктермен меморандумдар жасау, «Таза Қазақстан» акциясы аясында абаттандыру жұмысын жүргізу, халық қатысатын бюджет бағдарламаларын жүзеге асыру, үздік тұрғын үйлер байқауларын өткізу, кадрлық резерв қалыптастыру және бастауыш партия ұйымдарын құру сияқты бірқатар жүйелі бастамаларды жүзеге асырып келеді. Бұл бастамалар тұрғындар, басқарушы ұйымдар және жергілікті билік арасындағы өзара байланысты нығайтып, тұрғын үй-коммуналдық шаруашылығы саласындағы нақты мәселелерді шешуге мүмкіндік береді.
Форумда Мемлекет басшысы Қасым-Жомарт Тоқаевтың Жолдауында белгіленген міндеттерге ерекше назар аударылды. Абай облысының әкімі Берік Уәли бұл бағыттағы жұмыстар өңірде кезең-кезеңімен жүзеге асырылып жатқанын атап өтті.
«AMANAT» партиясы халықпен тікелей байланыс орнатып, тұрғындардың ұсыныс-пікірін ескеру арқылы нақты нәтижеге бағытталған жобаларды қолға алуда. Солардың қатарында «TURGYNDAR AMANATY» сияқты бастамалар тұрғын үй-коммуналдық саланы жаңғыртуға серпін беріп, басқару жүйесін ашық әрі тиімді етуге жол ашуда. Жоба аясында көппәтерлі тұрғын үйлерді басқару жүйесін жетілдіру, ашықтық пен есептілікті қамтамасыз ету, тұрғындардың шешім қабылдау процесіне белсенді қатысуына жағдай жасау бағытында нақты жұмыстар жүргізілуде. Сонымен қатар басқару процестерін цифрландыруға, сервистік қызмет сапасын арттыруға және тұрғындар мен басқарушы ұйымдар арасындағы өзара іс-қимылды күшейтуге ерекше назар аударылуда», – деді Берік Уәли.
Семей қаласының әкімі Әділет Қожанбаев қаладағы тұрғын үй қорын жаңарту жұмысы жүргізіліп жатқанын атап өтті. Бүгінде Семей қаласында 1588 көппәтерлі тұрғын үй бар. Бұл үйлерге 630 басқару органдары мен сервистік ұйымдар қызмет көрсетеді. Соңғы кезеңде 89 тұрғын үйдің қасбеті жаңартылып, 7 лифт ауыстырылған, ал биыл тағы 10 лифтіні жаңарту жоспарлануда. Сонымен қатар қалада «Таза Қазақстан» экологиялық акциясы аясында санитарлық тазалықты сақтау жұмысы жүйелі түрде жүргізілуде. Сенбіліктер тұрақты түрде ұйымдастырылып, оған тұрғындардың қатысу белсенділігі артып келеді. Бұл бастама тек қала аумағында ғана емес, облыс көлемінде де кеңінен жүзеге асырылуда.
Форум жұмысы соңында «AMANAT» партиясының мүшесі, «Асар» ПИК төрағасы Зәуре Қуанышбекова партия жұмысына алғыс білдіріп, өзекті мәселелерді ашық талқылауға мүмкіндік беретін алаңның маңызын атап өтті. Ол алдағы уақытта тұрғын үй-коммуналдық шаруашылығы жүйесінің тиімділігі артып, тұрғындардың басқару институттарына деген ықпалы мен көзқарасы нығая түсетініне сенім білдірді.
«AMANAT» партиясының баспасөз қызметі
