Semeytany.kz – Абай облысында «Таза Қазақстан» экологиялық бағдарламасының өңірде жүзеге асу барысы кеңейтілген аппараттық кеңесте қаралды. Жиынға облыс әкімі Берік Уәли төрағалық етті.
Кеңес барысында табиғи ресурстар және табиғат пайдалануды реттеу басқармасының басшысы Марат Теміржанов баяндама жасап, өңірде атқарылып жатқан жұмыстарды таныстырды. Оның айтуынша, Мемлекет басшысының бастамасымен қолға алынған бағдарлама 2024 жылдан бері жүйелі түрде жүзеге асырылып келеді. Осы мақсатта облыста 2024–2029 жылдарға арналған 44 іс-шарадан тұратын арнайы жоспар бекітілген.
Аталған жоспар аясында биыл 32 іс-шара жүзеге асырылады. Қазіргі таңда 3 сәуір мен 31 мамыр аралығында санитарлық-экологиялық екі айлық өтіп жатыр. Осы кезеңде ұйымдастырылған сенбіліктерге 29 мыңнан астам тұрғын, 2 мыңнан астам ұйым және жүздеген техника тартылған. Нәтижесінде мыңдаған аула, ондаған саябақ пен сквер, сондай-ақ ескерткіштер аумағы тазартылып, 2,8 мың тоннаға жуық қатты тұрмыстық қалдық шығарылған.
Сонымен қатар, су айдындары, арық жүйелері мен субұрқақтар тазартылып, көгалдандыру жұмыстары жүргізілуде. Биыл өңірде 67 мың ағаш отырғызу жоспарланып отыр. Бұдан бөлек, автожолдар бойында орман жолақтарын отырғызу арқылы экологиялық жағдайды жақсарту көзделген.
Қоғамдық тәртіп пен санитарлық талаптарды сақтау бағытында да бақылау күшейтілген. Жыл басынан бері 4 мыңнан астам әкімшілік хаттама толтырылып, 9 миллион теңгеден астам айыппұл салынған.
Жиын қорытындысында аймақ басшысы қала және аудан әкімдеріне тазалық жұмыстарын сапалы ұйымдастыруды, жасыл желектердің күтімін күшейтуді және сенбіліктердің тұрақты бақылауда болуын тапсырды. Сонымен қатар, өткен жылы анықталған кемшіліктерге тоқталып, қоқысты уақытылы шығару мәселесін биыл толық шешуді міндеттеді. Ол кәсіпорындар мен тұрғындардың сенбіліктерге белсенді қатысуының маңызын атап өтті.
