Semeytany.kz — Бүгін облыс әкімі Берік Уәлидің төрағалығымен өткен кеңейтілген аппараттық кеңесте өңірдің 2026 жылғы қаңтар-наурыз айларындағы әлеуметтік-экономикалық даму қорытындылары, «Таза Қазақстан» экологиялық бағдарламасының жүзеге асу барысы және су заңнамасы талаптарының сақталуы талқыланды.
Жиынға облыстық басқарма басшылары, өңірлік департамент жетекшілері қатысты. Қала және аудан әкімдері кеңеске бейнережим арқылы қосылды. Күн тәртібіндегі мәселелер бойынша облыс әкімінің бірінші орынбасары Ербол Садыр, табиғи ресурстар және табиғат пайдалануды реттеу басқармасының басшысы Марат Теміржанов, Ертіс бассейндік су инспекциясының басшысы Медет Жәдігер баяндама жасады.
Кеңесте өңірдің әлеуметтік-экономикалық дамуында оң үрдіс сақталғаны айтылды. Бірінші тоқсан қорытындысы бойынша қысқа мерзімді экономикалық индикатор 104,1 пайызды құрап, республикалық деңгейден жоғары болған. Өнеркәсіпте 103,2 пайыз, ауыл шаруашылығында 103,5 пайыз, инвестицияда 121,8 пайыз, тұрғын үй құрылысында 141,3 пайыз өсім тіркелген. Сонымен бірге көлік пен сауда салаларында да тұрақты даму бар. Тұрғын үйді пайдалануға беру көрсеткіші бойынша Абай облысы республикада бірінші орынға шыққан.
Жыл басынан бері облыстық бюджетке 207,8 млрд теңге салық түскен. Бұл өткен жылдың осы кезеңімен салыстырғанда едәуір жоғары. Негізгі капиталға салынған инвестиция көлемі 83,9 млрд теңгеге жетті. Қазіргі уақытта өңірде жалпы құны 4,3 трлн теңгеден асатын 107 инвестициялық жоба жүзеге асырылып жатыр. Осы жобалар аясында 15 мыңнан астам жаңа жұмыс орнын ашу жоспарланған.
Ауыл шаруашылығы саласында да өсім бар. Жалпы өнім көлемі ұлғайып, мал басы көбейген. Сонымен қатар су үнемдеу технологияларын енгізу жұмыстары кеңейіп, заманауи тәсілдер қолданылған егіс алқаптарының көлемі артқан.
Салық базасын ұлғайту бағытында да нақты нәтиже бар. Бірінші тоқсанда 63 салық төлеуші басқа өңірлерден Абай облысына қайта тіркеліп, бюджетке қосымша 422,3 млн теңге түскен. Бұл бағыттағы жұмыс Семей, Курчатов қалалары мен бірқатар аудандарда жүйелі жүргізіліп келеді.
Кеңесте алғашқы тоқсан қорытындысы бойынша қала және аудан әкімдерінің қызметіне жүргізілген рейтинг нәтижесі де жарияланды. Бағалау 83 көрсеткіш негізінде жасалған. Нәтижесінде Абай, Бесқарағай және Жаңасемей аудандары үздік үштікке енсе, Курчатов қаласы, Бородулиха және Көкпекті аудандары төменгі сатыдан көрінді.
Берік Уәли кеңесте өңір экономикасының тұрақты өсімін қамтамасыз ету үшін барлық салада жұмысты күшейту қажеттігін айтты. Үш ай қорытындысы бойынша төмен нәтиже көрсеткен қала мен аудан әкімдеріне кемшіліктерді жоюға бағытталған нақты шаралар қабылдауды тапсырды.
«Өңірдің әлеуметтік-экономикалық дамуы, халықтың әл-ауқаты мен бюджет тұрақтылығы – тікелей осы көрсеткіштердің орындалуына байланысты. Әрбір сала бойынша нақты нәтижеге жұмыс істеу қажет. Әкімдер мен басқарма басшылары өз бағыттары бойынша жауапкершілікті күшейтіп, жоспарланған көрсеткіштердің толық орындалуын қамтамасыз етуі тиіс», – деді облыс әкімі.
Кеңесте су заңнамасының сақталуы мәселесіне де ерекше назар аударылды. Өңірде қажетті құқықтық актілер қабылданып, су қорғау аймақтарын белгілеу жұмыстары басталған. Су нысандарын тазалау, жағалауды бекіту және су тасқынының алдын алу шаралары кезең-кезеңімен жүргізіліп жатыр. Сонымен қатар заңсыз су пайдалану мен рұқсатсыз құрылыс фактілерін анықтау және олардың алдын алу бағытындағы бақылау күшейтілген.
Облыс әкімі жауапты басқармалар мен әкімдіктерге су қорғау аймақтарын толық айқындау, тиісті белгілер орнату, су нысандарын санациялау жұмыстарын жандандыру, суармалы жерлерге қатысты нақты деректер ұсыну, ауыз суға арнайы рұқсаттарды рәсімдеу және су қорғау белдеулерінде заңсыз құрылысқа жол бермеу жөнінде нақты міндеттер жүктеді.
