Semeytany.kz — 2026 жылғы 24 сәуірде Семей қаласында Абай облыстық терроризмге қарсы жедел штабы Абай облысы бойынша Қылмыстық-атқару жүйесі департаментімен бірлесіп «Көктем-Антитеррор 2026» атты антитеррорлық оқу-жаттығу өткізуді жоспарлап отыр.
Іс-шараның негізгі мақсаты – түрлі ведомстволар арасындағы өзара іс-қимылды жетілдіру және терроризм қаупіне жедел әрекет ету үшін күштер мен құралдардың дайындығын арттыру. Оқу-жаттығу барысында шынайы жағдайларға барынша жақындатылған бірнеше сценарийлер пысықталады.
Оқу-жаттығу өтетін уақытта қала аумағында уақытша шектеулер енгізіледі. Атап айтқанда, жекелеген учаскелерде автокөлік қозғалысы ішінара шектелуі мүмкін.
Осыған байланысты қала тұрғындары мен қонақтарынан қауіпсіздік талаптарын сақтап, жүргізіліп жатқан іс-шараларға түсіністікпен қарау, жалған ақпарат таратпау және мемлекеттік органдар қызметкерлерінің заңды талаптарын орындау сұралады.
