Semeytany.kz – Абай облысындағы Алакөл жағалауында туристердің қауіпсіздігін арттыруға бағытталған әмбебап құтқару бөлімшесі ашылды.
Салтанатты шараға облыс әкімі Берік Уәли, Қазақстан Республикасының Төтенше жағдайлар министрі Шыңғыс Әрінов және азаматтық қорғау органдарының өкілдері қатысты. Жаңа нысан Қабанбай ауылы маңында орналасқан.
Құтқару бөлімшесінің құрылысы өткен жылдың шілде айында басталған. Бір қабатты ғимарат арнайы техника мен жүзу құралдарына арналған бокстармен жабдықталған. Бөлімше құрамында 6 бірлік арнайы техника бар, оның ішінде 2 құтқару катері мен 2 гидроцикл жұмыс істейді.
Аймақ басшысы жаңа нысанның маңызын атап өтіп, Алакөлге келетін туристер саны жыл сайын артып келе жатқанын жеткізді. Оның айтуынша, көл жағалауында ұзындығы 4 шақырым болатын аумақта 230 демалыс базасы, 100-ден астам сауда нысаны және 50-ден астам қоғамдық тамақтану орны қызмет көрсетеді. Өткен жылы бұл жерге 100 мыңнан астам турист келген.
Шара барысында аудан құтқарушыларына 7 авариялық-құтқару және жедел қызметтік автокөліктің кілттері табысталды. Сонымен қатар бөлімше аумағында көгалдандыру жұмыстары жүргізіліп, шырша көшеттері отырғызылды.
Жаңа нысан құрамында жедел әрекет етуге арналған капсулалық модуль де іске қосылған. Бұдан бөлек, жағалауды бейнебақылау және жасанды интеллект арқылы бақылау жобасы таныстырылды.
Қазіргі таңда демалушылардың қауіпсіздігін қамтамасыз ету үшін жағалауда 17 құтқару мұнарасы орнатылған, 35 құтқарушы-нұсқаушы даярланған. Өткен жылы 42 рейд жүргізіліп, қауіпсіздік талаптарын бұзғандарға қатысты 15 әкімшілік хаттама толтырылған.
Жалпы өңірде «Ауыл құтқарушылары» бағдарламасы аясында 75 өрт сөндіру бекеті жұмыс істейді. Биыл тағы 12 жаңа бекет ашу жоспарланып отыр.
