Semeytany.kz – Бүгін облыс әкімі Берік Уәли «Қазақстан темір жолы» ҰК» АҚ басқарма төрағасы Талғат Алдыбергеновмен кездесті.
Жиынға өңірлік басқарма басшылары, Аягөз, Үржар және Мақаншы аудандарының әкімдері, сондай-ақ мердігер ұйымдардың өкілдері қатысты. Кездесуде «Бақты – Аягөз» теміржол құрылысының іске асырылу барысы және облыстағы теміржол вокзалдарын жаңғырту жобалары жан-жақты талқыланды.
Аталған теміржол желісі Абай облысы үшін стратегиялық маңызы жоғары жоба ретінде қарастырылып отыр. Жоба жүзеге асқанда өңірде 1200 жаңа жұмыс орны ашылады деп күтілуде. Сонымен қатар, бұл бастама аймақ экономикасына серпін беріп, еліміздің транзиттік әлеуетін арттыруға ықпал етеді.
Аймақ басшысы жобаның ел үшін маңызын атап өтіп, оның Мемлекет басшысы Қасым-Жомарт Тоқаев тапсырмасына сәйкес жүзеге асырылып жатқанын жеткізді. Оның айтуынша, «Бақты – Аягөз» теміржол желісі Қазақстан мен Қытай арасындағы жүк өткізу мүмкіндігін 28 миллион тоннадан 48 миллион тоннаға дейін ұлғайтуға мүмкіндік береді. Бұл өз кезегінде оңтүстік бағыттағы бекеттерге түсетін жүктемені азайтып, қосымша транзиттік ағын тартуға жол ашады.
Жиында сондай-ақ өңірдегі теміржол инфрақұрылымын жаңғырту мәселесі де қозғалды. Қазіргі таңда Семей қаласы мен Аягөз, Шар, Ақтоғай, Жалаңашкөл, Дегелең, Үшбиік, Жарма, Белағаш және Ауыл елді мекендеріндегі 10 теміржол вокзалында қайта жаңарту жұмыстары жүргізіліп жатыр.
Кездесу қорытындысында тараптар жобаларды белгіленген мерзімде әрі сапалы жүзеге асыру, теміржол инфрақұрылымын одан әрі дамыту және өңірдің көлік-логистикалық әлеуетін арттыру бағытындағы жұмысты жүйелі түрде жалғастыруға келісті.
