Semeytany.kz – Облыс әкімі Берік Уәлидің төрағалығымен өткен әкімдік отырысында Семей қаласын дамыту жоспары қаралды. Жиында қала әкімі Әділет Қожанбаев атқарылып жатқан жұмыстар мен алдағы жобалар туралы баяндады.
Мемлекет басшысы айқындаған өңірлерді теңгерімді дамыту саясаты аясында Семейде инфрақұрылымды жаңғырту, инвестиция тарту және тұрғындардың өмір сүру сапасын арттыру бағытында бірқатар жоба жүзеге асырылуда.
Биыл қалада жалпы құны 68,9 млрд теңге болатын 14 инвестициялық жобаны іске асыру жоспарланған. Соның нәтижесінде 2300-ден астам жаңа жұмыс орны ашылмақ. Сонымен қатар 2030 жылға дейін жалпы құны 112,8 млрд теңгені құрайтын 17 ірі инвестициялық жоба кезең-кезеңімен жүзеге асырылады.
Қарағайлы шағын ауданында жаңа тұрғын үйлердің құрылысы басталып, инженерлік инфрақұрылым жүргізілуде. Қалада көпқабатты үйлердің қасбеттерін жаңарту және жөндеу жұмыстары да жалғасып жатыр. «Жарқын келешек» бастамасы аясында тұрғын кварталдарды реновациялау және қоғамдық кеңістіктерді дамыту көзделген.
Семейде жалпы ұзындығы 756 шақырым болатын 1179 көше бар. Былтыр асфальтталған жолдардың үлесі 50 пайызға жеткен. Биыл 100 көшеге орташа жөндеу жүргізу жоспарланып отыр. Сондай-ақ 100 аула абаттандырылып, тағы 100 аулаға асфальт төселеді.
Қоғамдық көлік паркі де кезең-кезеңімен жаңартылмақ. Жыл соңына дейін бірнеше жаңа автобус сатып алу көзделген. Бұдан бөлек, Ертіс өзені арқылы өтетін көпірді жаңғырту, жол айрықтарын салу және жаңа жол өткелдерін іске қосу жоспарланған.
Қаланы көгалдандыру жұмыстары да назарда. Биыл Семейде 8000 ағаш отырғызу көзделген. Саябақтар, жағалаулар мен қоғамдық орындарды жаңғырту жұмыстары жалғасады. Жақын уақытта орталық алаңды толық жаңарту жұмыстары басталмақ.
Отырыста коммуналдық қызметтердің материалдық-техникалық базасын жаңарту, арнайы техника сатып алу, спорт инфрақұрылымын дамыту және жаңа дене шынықтыру-сауықтыру кешендерін салу мәселелері де қаралды.
Аймақ басшысы қала әкіміне осы бағыттағы жұмыстарды жалғастыруды тапсырды. Сонымен қатар мүмкіндігі шектеулі азаматтарға жағдай жасау, жұмыспен қамту, кәсіпкерлікті қолдау және экология мәселелерін тұрақты назарда ұстау қажеттігін атап өтті.
«Семей – тұңғыштар мекені, Алаштың астанасы, қойнауы құтты, тарихы тағылымды өлке. Киелі шаһардың инфрақұрылымы ескіріп, тозып тұрғаны жасырын емес. Бүгін біз осы қасиетті мекеннің бет-бейнесін өзгертіп, заман талабына сай дамыту мәселесін пысықтадық. Семей облыс орталығы болғаннан кейін үнемі назарымызда болады. Биыл қаланы дамытуға айрықша мән беріп отырмыз. Тазалық жұмыстарын әлі де жандандыру қажет», – деді Берік Уәли.
