Semeytany.kz – Бүгін облыс әкімі Берік Уәли төрағалығымен өткен әкімдік отырысында ауыл шаруашылығы жерлерін айналымға енгізу, қоныс аударушыларды қабылдау және Семей қаласының даму жоспары талқыланды.
Жиынға облыстық басқарма басшылары, аудан және қала әкімдері қатысып, күн тәртібіндегі мәселелер бойынша жауапты тұлғалар баяндама жасады. Олардың қатарында сәулет, жер қатынастары, жұмыспен қамту саласының жетекшілері мен Әділет Қожанбаев бар.
Өңірде соңғы жылдары пайдаланылмай жатқан ауыл шаруашылығы жерлерін мемлекет меншігіне қайтару және қайта айналымға енгізу бағытында ауқымды жұмыс жүргізіліп келеді. 2022–2025 жылдары 481,5 мың гектар жер қайтарылып, оның едәуір бөлігі игеріле бастаған. Тек өткен жылдың соңғы тоқсанында жоспарланған көлемнен артық жер айналымға енгізілсе, биылғы алғашқы үш айда да белгіленген межеден жоғары көрсеткіш тіркелді.
Сонымен қатар бұрынғы Семей ядролық сынақ полигоны аумағындағы 983,7 гектар жер пайдалануға жарамды алқаптар қатарына қосылды. Оның ішінде 473,5 мың гектар жер Жаңасемей ауданына беріліп, кезең-кезеңімен шаруашылыққа тартылмақ.
Биыл пайдаланылмай жатқан 90 мың гектар жерді мемлекетке қайтару жоспарланған. Қазірдің өзінде 71,1 мың гектар жер қайтарылып, бұл жылдық жоспардың 79 пайызын құрап отыр. Жерлердің басым бөлігі жалдау мерзімінің аяқталуы, сот шешімдері немесе ерікті түрде кері қайтару арқылы алынған.
Аймақ басшысы бұл бағыттағы жұмысты күшейтіп, 2026 жылдың ортасына дейін барлық қайтарылған жерлерді толықтай айналымға енгізуді тапсырды. Сонымен қатар инвестор тарту мәселесіне ерекше назар аударуды міндеттеді.
Отырыста қоныс аудару бағдарламасының жүзеге асырылуы да қаралды. Бүгінде өңірге 811 отбасы немесе 2289 адам көшіп келген. Олардың көпшілігі Семей қаласы, Жарма және Үржар аудандарына орналасқан. Биыл белгіленген 539 адамдық квотаның 67,7 пайызы игерілген.
Қоныс аударған азаматтарды жұмыспен қамту да басты назарда. Еңбекке жарамды тұрғындардың 71,4 пайызы жұмысқа орналасқан, оның ішінде басым бөлігі тұрақты жұмыспен қамтылған.
Жиында «Қаладан – ауылға» жобасының маңыздылығы атап өтіліп, көші-қон саясатын тиімді жүргізу арқылы өңірдегі еңбек нарығын теңгерімде ұстау қажеттігі айтылды.
