Абай облысында республикалық ақпараттық-түсіндіру тобының қатысуымен дін саласындағы ақпараттық-түсіндіру жұмыстары өтті. Іс-шаралар Қазақстан Республикасы Мәдениет және ақпарат министрлігі Дін істері комитетінің қолдауымен 6–10 сәуір аралығында ұйымдастырылды.
Іссапардың басты мақсаты – тұрғындардың дінтанулық сауаттылығын арттыру, діни экстремизмнің алдын алу және дін саласындағы мемлекеттік саясаттың мәнін кеңінен түсіндіру болды. Сонымен қатар қоғамда деструктивті діни идеялардың таралуына тосқауыл қою бағытында түсіндіру жұмыстары жүргізілді.
Іс-шараларға дін саласының тәжірибелі мамандары қатысты. Олардың қатарында Абай облысы Дін мәселелерін зерттеу орталығының директоры Мақсат Өмірханов, Түркістан облысынан келген дінтанушы Медет Халықов, «Qamqor-Astana» қоғамдық қорының теологы Дастан Сақан және Шығыс Қазақстан облысынан теолог Ернұр Канапиянов бар.
Түсіндіру тобы өңірдегі әскери мекемелерде, білім беру ұйымдарында, сондай-ақ жергілікті әкімдіктер мен мәдениет үйлерінде кездесулер өткізді. Бұл кездесулерге студенттер мен оқытушылар, мектеп мұғалімдері мен оқушылар, спортшылар, әскери қызметкерлер және басқа да әлеуметтік топ өкілдері қатысты.
Кездесулер барысында қатысушылармен деструктивті діни ағымдардың белгілері, оларға қарсы тұру жолдары, сондай-ақ экстремизм мен терроризмге қатысты заңнамадағы жауапкершілік мәселелері талқыланды. Қатысушылар өздерін толғандырған сұрақтарын қойып, мамандардан нақты жауаптар алды.
Жалпы, өткізілген іс-шаралар халықтың құқықтық және діни сауаттылығын арттыруға ықпал етіп, қоғамда тұрақтылық пен қауіпсіздікті нығайтуға бағытталды.
