Semeytany.kz – Абай облысы Аягөз ауданында «Sarybulak Operating» ЖШС жүзеге асырып отырған «Сарыбұлақ» мыс кен орны ресми түрде іске қосылды. Кәсіпорынның ашылуына облыс әкімі Берік Уәли қатысып, өндіріс орнының жұмысына сәттілік тіледі.
Жаңа өндіріс орны 2024 жылы құрылған. Қазіргі таңда мұнда 300 адам тұрақты жұмыспен қамтылған. Жоба аясында сульфидті кенді өңдейтін байыту фабрикасы іске қосылып, оның жылдық қуаты 400 мың тонна кен өңдеуге жетеді. Нәтижесінде жыл сайын құрамында шамамен 20% мыс бар 30 мың тоннаға дейін концентрат өндіру жоспарланған. Өнім ішкі нарықпен қатар, экспортқа да бағытталады.
Кәсіпорынның негізгі бағыты – мыс өндіру. Бұл өңірдің тау-кен металлургия саласын дамытуға және өнеркәсіптік әлеуетін арттыруға мүмкіндік береді. Сонымен қатар жоба жаңа жұмыс орындарын ашуға және экономиканы әртараптандыруға ықпал етпек.
Кәсіпорын басшылығының мәліметінше, жұмысшылардың 70 пайызы – жергілікті тұрғындар. Жүк тасымалы да талапқа сай ұйымдастырылған: ауыр көліктерге жүктеме 8 тоннадан аспайды. Әлеуметтік жауапкершілік аясында Бидайық ауылында спорт нысанының құрылысы басталған.
Аймақ басшысы өндіріс орнын аралап, кен байыту фабрикасының, зертхананың және спорт кешенінің жұмысымен танысты. Ол инвесторлармен бірлесіп жұмыс істеудің маңызын атап өтіп, жергілікті тұрғындарды жұмыспен қамту басты талап екенін жеткізді.
Аталған жоба Абай облысының өнеркәсіптік даму көрсеткіштерімен де үндес келеді. 2026 жылдың алғашқы тоқсанында өңірде өндіріс көлемі 799,8 млрд теңгеге жетіп, өткен жылмен салыстырғанда 3,2%-ға артқан. Әсіресе өңдеу өнеркәсібінде өсім 8,1%-ды құрап отыр.
