Жеңістің 70 жылдық мерекесі Зайсан ауданында да кең көлемде әрі салтанатты түрде аталып өтті. Оның өзіндік себебі де жоқ емес. Шығыстың шалғай бұл өңірінде соғыс жылдарында майдан даласына аттанып, ерліктің ерен үлгісін көрсеткендер мен тылда еңбек етіп, Жеңісті жақындатуға үлес қосқандар қатары мол. Ал соғыс және еңбек ардагерлеріне құрмет көрсету бүгінгі буын үшін басты парыз екені белгілі. Бұл орайда Зайсан ауданының әкімі Алмас Оңдақановтың бастамасымен, аудандық ішкі саясат бөлімі және ардагерлер кеңесінің ұйытқы болуымен Жеңіс мерекесі қарсаңында бірқатар игі істер қолға алынған болатын. Осы шаралардың, аға буын өкілдеріне құрметтің шырқау шегі – 9 мамыр күні орын алды.
{jcomments on}Зайсандықтардың осынау мейрам-ға зор даярлықпен келгені аталмыш шара барысында айқын аңғарылды. Әсіресе, мерекені танымдық-тағылымдық тұрғыда өткізуге баса мән беріліпті. Мәселен, «Мәңгілік сапта!» атты патриоттық акцияда өскелең жас ұрпақ — мектеп оқушыларының белсенділігі айқын байқалды. Өрендердің ұйымдастырған әскери маршы Жеңіс мерекесінің сән-салтанатын барынша асқақтата түскендей еді.
Сондай-ақ осынау акция аясындағы аудандағы 20/17 әскери бөлімшенің сарбаздары әзірлеген мерекелік көріністер сол бір сұрапыл жылдардың жаңғырығын көз алдымызға айнытпай әкелгендей болды. Майдан даласын, өр рухты жауынгерлердің ерлікке ұмтылған сәтін бейнелейтін қойылымдар, әсіресе балалық шағын соғыс ауыртпашылығына берген аға буын өкілдерінің көздеріне еріксіз жас алдырды.
Мұнымен қатар зайсандық жұртшылық назарына соғыс техникаларынан әзірленген арнайы көрме де ұсынылған болатын. Бұл шара әсіресе жастар назарын ерекше аударды. Мерекенің негізгі иегерлері соғыс және тыл еңбеккерлері екені хақ. Осынау күні ардагерлер қауымына көрсетілген құрмет айрықша болды. Атап айтсақ, қадірменді қариялар Зайсан ауданының құрметті азаматы атағын иеленді. Сонымен қатар Зайсан ауданында туып-өсіп, майдан даласына аттанған, ұрыста шейіт болған және барша соғыс ардагерлеріне арналған арнайы кітаптің тұсаукесері 70 жылдық мерейтойдың мәнін еселей түскен еді.
Жалпы, мейрам қарсаңында да, мереке күні де барша ардагерлер аудан мекемелері тарапынан мерекелік сыйлықтар иеленді. Мәселен, «Строитель» ЖШС-нің басшысы Бақытбек Қалымұлы бастаған азаматтар аға буын өкілдеріне ерекше құрмет жасады. Десек те, ауылдық округтерде де мереке мәнін айшықтайтын бірқатар шаралар өткізілді. Атап айтсақ, Сартерек, Шілікті, Қаратал мен Кеңсай ауылдарында ескерткіш тақтаның ашылу рәсімі болып өтті. Елдімекендердегі шаралар ел игілігіне арналған жарқын істермен астасқаны қуантады. Атап айтсақ, майдангерлер ұрпақтары өз аталарының атындағы көшелерді жарықтындыру ісін қолға алыпты. Мәселен, Кеңсай ауылында Қажыкеновтер әулеті, Шіліктіде Құнапияновтар осындай игілікті істі жүзеге асырды. Жерлестері үшін тың тарту жасағандар қатарында Баймолдиндер мен Мұқановтар әулеттері де бар. Осынау күндері Көгедай ауылында мемориалдық тақта ашылса, Жарсуда ардагерлер құрметіне арналған саябақ есік ашты.
Мереке ән мен күйсіз өтпейтіні белгілі. Бұл ретте аудандық Мәдениет үйі өнерпаздарының әзірлеуімен концерттік бағдарламаларға да кезек берілді.
Ал кешкісін ымырт үйіріле «Тарбағатай-МұнайГаз» ЖШС-нің қызметкерлері Жеңіс мерекесі құрметіне ғаламат отшашулар кешін арнады. Оның соңы жастардың би кешіне ұласты.
Қ. ӘЛІМБЕК.
