Semeytany.kz – Абай облысының әкімі Берік Уәли Аягөз ауданына жұмыс сапары барысында Айғыз ауылдық округіне қарасты Көксала ауылының тұрғындарымен кездесті.
Кездесуде шалғай елді мекеннің бүгінгі жағдайы мен ауыл халқын толғандырған мәселелер талқыланды. Көксалада бүгінде 17 тұрғын үй бар, ауылда 81 адам тұрады. Елді мекенде медициналық пункт жұмыс істейді. Тұрғындардың негізгі кәсібі – мал шаруашылығы.
Ауыл халқы облыс әкіміне ауыз су, жол, байланыс сапасы және футбол алаңын салу мәселелерін жеткізді. Сондай-ақ тұрғындар жақын маңдағы «Сарыбұлақ» кен орны тарапынан ауылға қолдау көрсетілсе деген тілектерін айтты.
Кездесуге осы ауылдың тумасы, белгілі әнші Тоқтар Серік те қатысты. Ол ауылдағы ең өзекті мәселенің ауыз су екенін айтып, тұрғындар атынан аймақ басшысына алғыс білдірді.
Берік Уәли тұрғындардың ұсыныс-пікірін тыңдап, Шұбартау өңіріндегі ауылдардың проблемалары кезең-кезеңімен шешілетінін жеткізді. Аймақ басшысы «Қарағанды – Боғас» республикалық жолы жөнделіп, «Аягөз – Бақты» теміржолының құрылысы аяқталса, осы маңдағы елді мекендердің дамуына тың серпін берілетінін атап өтті.
Облыс әкімі Көксала ауылы мал шаруашылығына қолайлы мекен екенін айтып, алдағы уақытта Шұбартау өңірінің әлеуетін арттыру бағытында тиісті қолдау көрсетілетінін мәлімдеді.
