Semeytany.kz – Абай облысында фитосанитариялық тұрақтылықты қамтамасыз ету және ауыл шаруашылығы алқаптарын зиянкестерден қорғау бағытында кешенді жұмыс жүргізіліп жатыр.
Облыс әкімі Берік Уәли Бородулиха ауданына жұмыс сапары барысында шегіртке ошақтарын анықтау және зерттеу жұмыстарының барысымен танысты. Аудан орталығында жер үсті бүріккіш техникаларды қолдану арқылы химиялық өңдеу бойынша оқу-жаттығу шарасы ұйымдастырылды.
Іс-шара аясында аса қауіпті зиянды организмдерге қарсы фитосанитариялық шараларды жүргізу маусымына дайындық мәселелері қаралған көшпелі штаб отырысы өтті. Оған Ауыл шаруашылығы министрлігі Агроөнеркәсіптік кешендегі мемлекеттік инспекция комитетінің төрағасы Сәкен Қаныбеков, сондай-ақ «Республикалық фитосанитарлық диагностика және болжамдар әдістемелік орталығының» басшысы Елтай Хамиджанұлы қатысты.
Жиында Абай облысы бойынша аумақтық инспекция басшысы М. Жанабаев пен Болжам әдістемелік орталығы облыстық филиалының басшысы М. Бектеміров өңірде атқарылып жатқан жұмыстар туралы баяндады.
Биыл облыста үйірлі шегірткелерге қарсы химиялық өңдеу жұмыстары 119 310 гектар аумақта жүргізілмек. Оның ішінде итальяндық прусқа қарсы 92 310 гектар, азиялық шегірткеге қарсы 27 000 гектар жер қамтылады. Бұдан бөлек, саяқ шегірткеге қарсы 62 094 гектар аумақта өңдеу жоспарланған.
Зиянкестердің таралуын бақылау және шұғыл әрекет ету үшін облыс бойынша 11 жедел штаб құрылған. Кең көлемді мониторинг пен зерттеу жұмыстары 1 563,1 мың гектар аумақта жүргізіледі. Бұл іске 79 анықтаушы маман, 18 инспектор және ауыл шаруашылығы басқармасының 11 қызметкері тартылады. Мамандар 39 автокөлікпен қамтамасыз етіледі.
Химиялық өңдеу кезінде 17 жер үсті бүріккіш техника, 3 арнайы агрегат, 2 жеңіл авиация және 1 аэрозольді генератор қолданылады. Шара барысында шегіртке зиянкестерін зерттеуге және өңдеу жұмыстарын бақылауға арналған аудандық аумақтық және болжам әдістемелік филиалдарының техникалары таныстырылды.
Берік Уәли жауапты сала өкілдеріне шегірткеге қарсы жұмыстарды қатаң бақылауда ұстап, барлық шараны уақтылы әрі тиімді орындауды тапсырды.
«Шаруаларға зардабын тигізбеу үшін шегірткелердің санын азайту жұмыстарын жүйелі түрде жүргізуіміз керек. Ең бастысы, алдын алу шараларын уақтылы қолға алуымыз қажет. Әкімдік тарапынан тиісті қолдауды көрсетеміз», – деді облыс әкімі.
