{jcomments on}Жеңіс мерекесі қарсаңында Үржар ауданында бірқатар іргелі істер жүзеге асырылды. Әсіресе, кешегі сұрапыл соғыста ерліктің ерен үлгісін көрсеткен ардагерлерге құрмет шарасына ерекше басымдық берілді.
Бұл ретте Үржар ауданының әкімі Серік Зайнулдин, аудандық ардагерлер кеңесінің төрағасы Н.Сандыбаев, аудандық мәслихат хатшысы Қ. Бітімбаев, Үржар ауылдық округінің әкімі С. Шарықпаев аудандық қор-ғаныс істері жөніндегі бөлім басшысы Қ.Құлсейітов және бөлім басшылары мен БАҚ өкілдері әр ардагердің шаңырағына бас сұғып, мерекелерімен құттықтады. Сонымен бірге 500 мың теңге көлемінде қаржылай сый мен соңғы үлгідегі түрлі-түсті теледидар және аудандағы барлық мекемелер мен бөлімдер атынан арнайы сыйлықтар табыс етілді.
— Бұл барлығымызға ортақ мереке. Жерлестеріміздің Жеңіске қосқан үлесі өлшеусіз. Сіздер сыйлаған бейбіт өмірде бүгінде еліміз дамып келеді. Сіздерге әрқашан құрмет көрсету біздің парызымыз, мерекелеріңіз құтты болсын, — деді аудан әкімі.
Өз кезектерінде жастық шақтарын ел іргесінің тыныштығына арнап, Жеңіс туын желбіретіп оралған майдангерлер де өздеріне көрсетілген құрмет үшін алғыстарын білдірді.
Бауыржан ЖАҚЫП,
«Семей таңы»
