Semeytany.kz – Абай облысында агроөнеркәсіп кешенін дамыту бағытында жүйелі жұмыстар жалғасуда. Облыс әкімі Берік Уәлидің төрағалығымен өткен кеңейтілген жиында саланың қазіргі ахуалы мен алдағы жоспарлар кеңінен талқыланды.
Жиынға басқарма басшылары мен департамент жетекшілері қатысып, аудан және қала әкімдері бейнебайланыс арқылы қосылды. Негізгі баяндаманы ауыл шаруашылығы басқармасының басшысы Ертай Қуанбаев жасады.
Өңірде Мемлекет басшысының ауыл шаруашылығы өнімін екі есеге арттыру жөніндегі тапсырмасы аясында нақты шаралар қолға алынған. Соның нәтижесінде 2025 жылы агроөнеркәсіп кешені тұрақты өсім көрсетіп, облыс республика бойынша үздіктер қатарынан көрінді.
Егін шаруашылығында да оң өзгерістер бар. Биыл егіс алқабы 789,3 мың гектарға жетіп, майлы дақылдар көлемі 340,3 мың гектарға ұлғайған. Көктемгі дала жұмыстарына «Кең дала» бағдарламасы арқылы 14 млрд теңге бөлініп, шаруаларға қолдау көрсетілді. Сонымен қатар, салаға 700 жаңа техника алынған.
Агросаланы дамыту мақсатында 2026-2028 жылдарға арналған инвестициялық жобалар Жол картасы бекітілген. Жалпы құны 112,5 млрд теңгені құрайтын 19 жоба жүзеге асырылмақ. Биылдың өзінде 6 жоба іске қосылып, 400-ден астам жұмыс орны ашылады. Соның бірі – «Агролидер KAZ» зауыты, ол бұршақ және басқа да дақылдарды өңдеумен айналысады.
Өңдеу өнеркәсібінде де ірі жобалар жоспарланған. Атап айтқанда, жылына 11 400 тонна өнім шығаратын ет комбинаты және 72 мың тонна күнбағыс майын өндіретін зауыт іске қосылмақ.
Өңірде ауыл шаруашылығын әртараптандыру бағытында ұзақ мерзімді жобалар пулы да жасақталған. 2031 жылға дейін жалпы құны 254 млрд теңгені құрайтын 90 инвестициялық жоба жүзеге асырылады. Бұл бастамалар нәтижесінде 2 мыңнан астам жаңа жұмыс орны құрылмақ.
Сонымен қатар, Бесқарағай ауданында ірі құс фабрикасының құрылысы басталмақ. Жоба толық іске қосылғанда жылына 150 млн дана жұмыртқа өндіріледі. Жарма және Бесқарағай аудандарында заманауи сүт фермаларын салу да жоспарланып отыр.
Мал шаруашылығы, оның ішінде қой өсіру саласына ерекше назар аударылған. Осы мақсатта арнайы бағдарлама қабылданып, асыл тұқымды мал санын арттыру көзделуде.
Су ресурстарын тиімді пайдалану да басты назарда. Алдағы жылдары өңірде жаңа су қоймалары салынып, ирригациялық жүйелер жаңғыртылады.
Жиын қорытындысында облыс әкімі агросаланы одан әрі дамыту, инвестиция тарту және өңдеу бағыттарын күшейту қажеттігін атап өтті. Оның айтуынша, Абай облысының ауыл шаруашылығына қолайлы мүмкіндігі мол, сондықтан осы әлеуетті тиімді пайдалану – басты міндет.
