Semeytany.kz – Абай облысында құрылыс нысандарының сапасын бақылау және мемлекеттік сатып алу рәсімдерін ұйымдастыру мәселелері кеңейтілген аппараттық кеңесте қаралды.
Жиын облыс әкімі Берік Уәлидің төрағалығымен өтті. Оған облыстық басқарма басшылары, өңірлік департамент жетекшілері қатысты. Аудан және қала әкімдері бейнебайланыс арқылы қосылды.
Күн тәртібіндегі мәселелер бойынша мемлекеттік сәулет-құрылыс бақылау басқармасының басшысы Сайлауғалы Байназаров пен мемлекеттік сатып алу басқармасының басшысы Жайық Орман баяндама жасады.
Мемлекеттік сәулет-құрылыс бақылау басқармасының мәліметінше, өңірде құрылыс саласына бақылау күшейтіліп келеді. Былтырғы мониторинг нәтижесінде 18 бюджеттік нысанда анықталған бұзушылықтардың 5-еуі толық жойылған, тағы 5 нысанда тиісті жұмыстар жалғасуда.
Аймақ басшысы құрылыс нысандары заң талаптарына сай әрі халық үшін қауіпсіз болуы керек екенін атап өтті. Оның айтуынша, бұл бағыттағы әрбір мәселе нақты әрі жедел шешімді қажет етеді.
Берік Уәли жауапты басқармалар мен аудан, қала әкімдеріне құрылыс нысандарындағы құжаттарды заң талаптарына сай рәсімдеуді қатаң бақылауға алуды тапсырды. Сондай-ақ анықталған кемшіліктерді қысқа мерзімде жою, іске аспай қалған жобалық-сметалық құжаттамаларға талдау жүргізу және бюджеттік жобаларға бөлінген қаржының тиімді игерілуін қамтамасыз ету міндеттелді.
Бұдан бөлек, «Ауылдық денсаулық сақтауды жаңғырту» жобасы аясында салынып жатқан медициналық нысандардың инженерлік желілерін заң талаптарына сәйкес рәсімдеу мәселесі де назарға алынды.
Жиында мемлекеттік сатып алу жүйесінің ашықтығы мен тиімділігі де сөз болды. Облыс әкімі бұл бағытта бәсекелестік ортаны дамыту, конкурстық рәсімдердің қолжетімділігін қамтамасыз ету маңызды екенін айтты.
Айта кетейік, облыста мемлекеттік сатып алу рәсімдерін заң талаптарына сай өткізу мақсатында орталықтандырылған оқыту семинары ұйымдастырылып, оған 585 адам қатысқан.
