Semeytany.kz – Семейде БАҚ өкілдері арасында шағын футболдан белгілі журналист, көрнекті спорт комментаторы Амангелді Сейітханды еске алуға арналған республикалық турнир аяқталды.
Биылғы жарысқа еліміздің 6 облысы мен 4 қаласынан 12 команда қатысты. Олардың қатарында Qazaqstan TV, «Абай облысы», Aqmeshit, «Атырау», Kazmedia, Qareket, «Семей», Setanta, «Тараз Пресс», «Хабар», «Шымкент» және Bek Sport командалары бар.
Амангелді Сейітхан атындағы «Seitkhan cup» республикалық турнирі 2022 жылдан бері дәстүрлі түрде ұйымдастырылып келеді. Бұған дейін жарыс төрт рет Алматы қаласында өткен. Биыл облыс әкімі Берік Уәлидің бастамасымен турнир алғаш рет Амангелді Сейітханның туған жері – Абай елінде, Семей қаласында өткізілді.
Турнир қорытындысы бойынша Абай облысының командасы ақтық сында «Казмедиа» командасымен кездесіп, пенальти сериясында жеңіске жетті. Осылайша өңір командасы бірінші орынды иеленді. Екінші орын Астана қаласынан келген «ҚазМедиа» командасына бұйырса, үшінші орынды Жетісу облысының «Қаракет» командасы алды.
Жеңімпаздарға ақшалай сыйлықтар табысталды. Бірінші орынға 2 миллион теңге, екінші орынға 1 миллион теңге, үшінші орынға 500 мың теңге берілді.
Сондай-ақ жарыста ерекше көзге түскен ойыншылар «Үздік сұрмерген», «Үздік қақпашы», «Үздік қорғаушы», «Үздік шабуылшы», «Үздік ойыншы», «Құрмет» және «Жеңіске деген жігері үшін» номинациялары бойынша марапатталды.
Турнирдің жабылу салтанатында облыс әкімі Берік Уәли қатысушыларға алғыс айтып, жарыстың жоғары деңгейде өткенін атап өтті.
«Бүгінгі жарысымыз өте жоғары деңгейде өтті деп есептейміз. Оған алаңдағы тартысты ойындар дәлел. Баршаңызды Амангелді Сейітхан турниріне арнайы келіп, Семей жерінде жарыстың көрігін қыздырғандарыңыз үшін облыс жұртшылығы атынан алғыс айтамын», – деді Берік Уәли.
