Семейдегі Абай атындағы қазақ музыкалық драма театры сахнасында жас драматург Жәнібек Әлікеннің «Қарағай» атты әлеуметтік драмасының премьерасы өтті. Қойылымды режиссер Серікжан Айтқалиев сахналады.
Премьера 10 мамыр күні театр көрермендеріне жол тартты. Спектакльде қазіргі қоғамдағы өзекті мәселелер көтеріліп, табиғат пен адам арасындағы байланыс, туған жер алдындағы жауапкершілік, заң мен әділет тақырыптары кеңінен қамтылды.
Қойылым оқиғасы шығыс өңіріндегі орман ішінде өрбіді. Алғашында қарапайым қызметкерлердің күнделікті тіршілігі ретінде басталған сюжет біртіндеп қоғамдағы күрделі мәселелерді ашып көрсетті. Табиғатты қорғауға міндеттелген жандардың өз қолымен орманға зиян келтіруі, заңның аяқасты болуы, билік пен байлықтың әділеттен үстем түсуі қойылымның негізгі тартысына айналды.
Спектакльде адам мен табиғат арасындағы нәзік байланыс, жеке мүдде мен қоғамдық жауапкершілік, қорқыныш пен батылдық секілді қарама-қайшылықтар шынайы бейнеленді. Көрерменге терең ой салған туынды қоғамдағы экологиялық және әлеуметтік мәселелерді көркем түрде жеткізе алды.
Қойылым идеялық тұрғыда Мемлекет басшысы Қасым-Жомарт Тоқаев ұсынған Таза Қазақстан бастамасымен үндесіп, табиғатты қорғау мен қоршаған ортаға жанашырлық таныту мәселелерін арқау етті.
Премьера театрсүйер қауым тарапынан жылы қабылданып, өзекті тақырыпты қозғаған мазмұнды туынды ретінде бағаланды.
