Semeytany.kz – Семей қаласындағы Шәкәрім университетінде өткен «ABAI SCIENCE FEST» фестивалі аясында Абай облысының әкімі Берік Уәли өңірдің жас ғалымдарымен кездесті.
Кездесуге Шәкәрім университеті, Alikhan Bokeikhan University, Семей медицина университеті, Ұлттық ядролық орталық, Ядролық технологиялар паркі, Ядролық медицина және онкология орталығы, Қазақ қайта өңдеу және тағам өнеркәсібі ғылыми-зерттеу институтының жас ғалымдары қатысты.
Фестиваль барысында агротехнология, медицина, жасанды интеллект, биотехнология, ядролық технологиялар, экология және тағам өндірісі бағытындағы ғылыми жобалар мен инновациялық әзірлемелер көрмесі ұйымдастырылды. Сондай-ақ жас ғалымдардың ғылыми өнімдері таныстырылып, дегустация аймағы жұмыс істеді.
Шәкәрім университетінің өкілдері агротехнопарк, инженерлік және зертханалық жобаларын таныстырса, Семей медицина университетінің студенттері онкология, ЭКГ талдау және ерекше қажеттілігі бар жандарға арналған жасанды интеллект негізіндегі жобаларын ұсынды. Ал Ұлттық ядролық орталық пен Ядролық технологиялар паркі атом энергетикасы, радиациялық технологиялар және өнеркәсіптік инновациялар бағытындағы жұмыстарын көрсетті.
Кездесу барысында аймақ басшысы өңірдің ғылыми әлеуетін арттыру, қолданбалы ғылымды дамыту және жастардың ғылыммен айналысуына қолайлы жағдай жасау мәселесіне тоқталды.
Берік Уәлидің айтуынша, Семей қаласының солтүстік бөлігіндегі жаңа Smart City аумағында заманауи «Ғалымдар үйі» салу жоспарланып отыр. Онда ғылыми зертханалар, қажетті инфрақұрылым мен заманауи құрал-жабдықтар орналастырылады.
Сондай-ақ облыс әкімі қала әкіміне «Otbasy Bank»-пен бірлесіп жас ғалымдарды «Абай жастары» бағдарламасына енгізуді тапсырды. Бұдан бөлек, жас зерттеушілерге қоғамдық бірлестік құрып, ғылым саласындағы мәселелерді әкімдік және бизнес өкілдерімен бірлесіп шешу ұсынылды.
Жиын қорытындысында өңірлік ғылымды дамытуға арналған кешенді жоспар әзірлеу тапсырылып, оған жас ғалымдардың ұсыныстары ескерілетіні айтылды.
