Semeytany.kz – Абай облысында мобильді байланыс пен интернет инфрақұрылымын дамыту бағытында жаңа жұмыстар қолға алынбақ.
Облыс әкімі Берік Уәли «Мобайл Телеком-Сервис» ЖШС Басқарма төрағасы Александр Бабичев бастаған делегациямен кездесті. Жиында өңірдегі байланыс сапасын арттыру, жаңа базалық станциялар орнату, ауылдық елді мекендердегі интернет жылдамдығын жақсарту және туристік аймақтарды сапалы байланыспен қамту мәселелері талқыланды.
Қазіргі таңда облыс елді мекендерінің 68 пайызы Tele2/Altel желісімен қамтылған. Ал Семей қаласында 59 базалық 5G станциясы жұмыс істеп тұр.
Кездесуде облыс әкімі Мемлекет басшысы Қасым-Жомарт Тоқаевтың 2026 жылды Цифрландыру және жасанды интеллект жылы деп жариялағанын атап өтті. Оның айтуынша, бұл бағытта Абай облысында бірқатар ірі жоба жүзеге асырылып жатыр.
Жиын қорытындысы бойынша Абай облысының әкімдігі мен «Мобайл Телеком-Сервис» ЖШС арасында байланыс пен интернетті дамыту бағытындағы өзара іс-қимыл туралы меморандумға қол қойылды.
Меморандум аясында 2026 жылы Семей қаласында 5G стандартының 29 базалық станциясын іске қосу, қосымша 10 базалық станция салу және 26 станцияны жаңғырту жоспарланған. Сонымен қатар облыс аумағындағы елді мекендерде тағы 7 базалық станция орнатылып, 3 станция жаңартылады.
Сондай-ақ интернет сапасы төмен ауылдарда 3G желісін 4G форматына көшіру, Семей қаласындағы байланыс әлсіз аймақтарды жою, Алакөл жағалауы мен Қабанбай ауылындағы мобильді интернет сапасын арттыру бағытында жұмыстар жүргізіледі.
Айта кетейік, соңғы үш жылда «Мобайл Телеком-Сервис» компаниясының Абай облысына салған инвестиция көлемі 6,5 млрд теңгеден асқан. Биыл өңірдің байланыс және интернет инфрақұрылымын дамытуға шамамен 1,2 млрд теңге инвестиция салу жоспарланып отыр.
