Semeytany.kz – Абай облысының әкімі Берік Уәли Семей қаласындағы теміржол вокзалын реконструкциялау жұмыстарының барысымен танысты.
Қазір өңірде 10 теміржол вокзалын жаңғырту жұмыстары жүргізіліп жатыр. Олардың қатарында Семей, Аягөз, Шар, Ақтоғай, Жалаңашкөл, Дегелең, Үшбиік, Жарма, Белағаш және Ауыл станциялары бар.
1915 жылы салынған Семей теміржол вокзалын қайта жаңғыртудың болжамды құны 5,7 млрд теңгені құрайды. Жоба аяқталғаннан кейін ғимараттың жалпы аумағы 3 мың шаршы метрден 4,7 мың шаршы метрге дейін ұлғаяды.
Қазіргі уақытта нысанда су құбыры мен кәріз желілерін жүргізу жұмыстары аяқталған. Шатыр жабу және ішкі қалқаларды орнату жұмыстары жалғасуда. Құрылысқа 32 жұмысшы мен 3 арнайы техника жұмылдырылған.
Жөндеу кезеңінде жолаушыларға қызмет көрсету үшін вокзал маңынан уақытша күту орны ұйымдастырылды. Жобаны 2026 жылдың соңына дейін аяқтау жоспарланған.
Аймақ басшысы вокзалдың қала инфрақұрылымындағы маңызына тоқталып, құрылыс сапасы мен мерзімін қатаң бақылауда ұстауды тапсырды. Берік Уәлидің айтуынша, облыста жаңғыртылып жатқан вокзалдар Президенттің тікелей бақылауындағы нысандардың қатарына кіреді.
«Жұмыстарды мерзімінен бұрын, қар жауғанға дейін бітіру керек. Халықты далада тоңдыруға болмайды», – деді облыс әкімі.
Айта кетейік, вокзал ғимаратынан бөлек, осы аумақтағы жаяу жүргіншілер көпірі мен темір жолдар да қайта жаңғыртылады.
