Semeytany.kz – Абай облысының әкімі Берік Уәли Семей қаласын аралау барысында Қарағайлы шағын ауданындағы тұрғын үй құрылысының барысымен танысты.
Қазіргі уақытта ықшам ауданда 13 көпқабатты тұрғын үй салынып жатыр. Құрылыс жұмыстары 2024 жылдың шілде айында басталған. Нысандарды биыл тамыз айының соңына дейін пайдалануға беру жоспарланған.
Жоба аясында жалпы аумағы 67 926 шаршы метр болатын тұрғын үйлер бой көтеруде. Оның ішінде пәтерлердің жалпы аумағы 51 090 шаршы метрді құрайды. Барлығы 712 пәтер салынуда.
Бүгінде құрылыс алаңында ғимараттардың қаңқасы толық тұрғызылған. Мердігерлер әрлеу жұмыстары мен ішкі инженерлік желілерді тартуға кіріскен. Электрмонтаждау, сантехникалық және қасбеттік жұмыстар жүргізіліп жатыр.
Аймақ басшысы жауапты сала жетекшілеріне құрылыс сапасы мен мерзімін қатаң бақылауда ұстауды тапсырды.
«Халықты баспанамен қамтамасыз ету – басты міндеттердің бірі. Сондықтан құрылыс жұмыстары сапалы әрі белгіленген мерзімде аяқталуы керек. Тезірек пайдалануға беріңіздер. Қаншама күтіп отырған халық бар», – деді Берік Уәли.
Тұрғын үйлер тұрғын үй-коммуналдық инфрақұрылымды дамытудың 2023-2029 жылдарға арналған тұжырымдамасы аясында жүзеге асырылуда.
Сонымен қатар облыс әкімі 29 тұрғын үйдің құрылыс барысын да көрді. Қазіргі таңда жалпы аумағы 22 500 шаршы метрді құрайтын, 414 пәтерлі 5 тұрғын үйдің құрылысы басталған. Бұл жобаны да биыл аяқтап, пайдалануға беру жоспарланып отыр.
