Semeytany.kz – Абай облысының әкімі Берік Уәли Семей қаласындағы құрылыс нысандарын аралап, ескі автогуж көпірінің маңында салынып жатқан жаңа көлік өткелінің жұмыс барысымен танысты.
Мемлекет басшысының тапсырмасымен жүзеге асып жатқан жобаның құрылысы 2022 жылы басталған. Көпірдің ұзындығы 810 метрді, ені 23 метрді құрайды. Нысанның жалпы құны – 47,3 млрд теңге.
Қазіргі таңда құрылыс жұмыстарының 65 пайызы аяқталған. Жоба бойынша 9 тірек орнату көзделсе, оның 8-і тұрғызылған. Сондай-ақ 9 мың тонна металл конструкцияның 4,3 мың тоннасы монтаждалып, жоғарғы металл аралық құрылымның 418 метрі орнатылды.
Құрылыс алаңында 174 адам еңбек етіп жатыр. Қажетті материалдар толық көлемде сатып алынған. Атап айтқанда, 9 мың тонна металл конструкция жеткізілген. Көпір арқылы көлік қозғалысын биыл іске қосу жоспарланып отыр.
Осы уақытқа дейін жобаға 27 млрд теңге игерілген. Биыл жергілікті бюджеттен қосымша 2 млрд теңге бөлінді.
Аймақ басшысы құрылыс сапасын қатаң бақылауда ұстап, жұмысты белгіленген мерзімде аяқтауды тапсырды.
«Бұл көпірді былтыр ҚХР гранты есебінен аяқтау жоспарланған болатын. Кейін жобаны қаржыландыру тетіктеріне өзгерістер енгізіліп, қажетті 17,5 млрд теңге Үкіметтен бөлінетін болды. Президенттің тапсырмасымен салынып жатқан әрі оның тікелей бақылауында тұрған бұл көпірді биыл пайдалануға беруіміз қажет. Сондықтан ешқандай сылтау қабылданбайды. Жұмыс қарқынын бәсеңдетпеу керек», – деді Берік Уәли.
