Semeytany.kz – Абай облысының делегациясы Австралияға барып, мал шаруашылығындағы заманауи технологиялар мен тиімді басқару тәжірибесін зерделеді. Сапар барысында өңір өкілдері ірі шаруашылықтарды аралап, қой және ірі қара өсірудегі озық әдістермен танысты.
Делегация әлемге танымал меринос, дорпер, австралиялық ақ қой, тексель және полл дорсет секілді қой тұқымдарының ерекшеліктерін көрді. Сонымен қатар 5 мың бас ірі қара мен 60 мың бас қойға арналған ірі сауда орталығының және заманауи бордақылау алаңдарының жұмысы таныстырылды.
Австралиялық мамандар қойды асылдандыру, өнімділікті арттыру және жүн сапасын жақсарту бағытындағы тәжірибелерін көрсетті. Делегация мүшелері қой қырқу процесімен де танысып, оның өндірістік тиімділігіне назар аударды.
Сапар барысында автоматтандырылған жем беру жүйелері мен цифрлық басқару технологиялары ерекше қызығушылық тудырды. Мұндай шешімдер малдың тез салмақ қосуына және шаруашылық шығындарын азайтуға мүмкіндік береді.
Кездесу қорытындысында жайылымдарды тиімді пайдалану, екпе шөп егу, қоршау арқылы мал жаю жүйесін енгізу және автоматтандырылған бордақылау алаңдарын іске қосу жоспарланды.
Сондай-ақ ангус және герефорд тұқымды ірі қара сатып алу мәселесі бойынша келіссөздер жүргізілді. Бұл бастамалар өңірдегі ет сапасын арттыруға және мал шаруашылығының өнімділігін күшейтуге бағытталған.
