Semeytany.kz – Абай облысында суға шомылу маусымы қарсаңында тұрғындардың қауіпсіздігін қамтамасыз ету мәселесі қаралды. Бұл туралы облыс әкімі Берік Уәлидің төрағалығымен өткен әкімдік отырысында айтылды.
Қазір өңірдегі су айдындарында бұқаралық демалыс, туризм және спортқа арналған 21 орын белгіленген. Оның 15-і коммуналдық жағажай, 2-еуі жеке жағажай, тағы 4-еуі жаппай демалыс аймағы.
Мамандардың айтуынша, өткен жылы облыстағы су айдындарында 12 адам, оның ішінде 4 бала суға батып қайтыс болған. Қайғылы жағдайлардың басым бөлігі қауіпсіздік ережелерін сақтамау, мас күйінде суға түсу және балаларды қараусыз қалдыру салдарынан болған.
Шомылу маусымына дайындық аясында Алакөл жағалауында құтқару станциясы ашылды. Сонымен қатар халық көп жиналатын орындарда патрульдеу күшейтіліп, 30 жаяу және 16 мобильді бекет қойылады. Бұл жұмыстарға төтенше жағдайлар департаменті мен әскери бөлімнің 100-ден астам қызметкері жұмылдырылады.
Су айдындарында оқу-жаттығулар өткізу, су түбін тазарту, қауіпті аумақтарға ескерту белгілерін орнату және тұрғындар арасында түсіндіру жұмыстарын күшейту де жоспарланып отыр. Жиында Алакөл көліндегі шағын көлемді кемелер үшін арнайы пирстер орнату, жағалаудағы бейнебақылау жүйесін кеңейту, сондай-ақ Семей қаласындағы жабдықталмаған жағажайларды ретке келтіру мәселелері көтерілді.
Облыс әкімі қала және аудан әкімдеріне шомылу маусымындағы қауіпсіздік шараларын күшейтуді тапсырды. Сондай-ақ жабдықталмаған жағажайларды бақылауға алып, ресми демалыс орындарының санын арттыру, туристік аймақтардың қауіпсіздігі мен инфрақұрылымына талдау жүргізу және шағын көлемді кемелердің қозғалысын қатаң бақылау қажеттігін айтты.
«Шомылу кезеңіндегі қауіпсіздік мәселесі ерекше жіті бақылауды талап етеді. Әрбір қайғылы жағдайдың артында адам өмірі тұрғанын ұмытпауымыз қажет», – деді Берік Уәли.
Отырыста «Таза Қазақстан» республикалық бағдарламасының жүзеге асу барысы да қаралды. Бағдарлама аясында 16 мамыр күні облыстың барлық елді мекендерінде санитарлық тазалық жұмыстары ұйымдастырылған. Сенбілікке 15 мыңнан астам тұрғын қатысып, 471 ұйым мен 204 техника жұмылдырылды. Нәтижесінде 1651 аула, 79 саябақ пен сквер тазартылып, 3342 тонна қоқыс шығарылды.
Сонымен қатар биыл облыс аумағында 67 мың көшет отырғызу жоспарланған. Бүгінгі таңда оның 52 мыңнан астамы егілді.
