«AMANAT» партиясының «Халықпен бірге!» 2023–2027 сайлауалды бағдарламасы аясында Абай облысы Абай ауданына қарасты Орда елді мекенінің тұрғындары тарапынан көп жылдан бері көтеріліп келген амбулаториялық пункт мәселесі шешімін тауып, нысан халық игілігіне берілді.
300-ге жуық тұрғыны бар елді мекенде бұрын амбулаториялық пункт болмаған. Медициналық көмек алу үшін тұрғындар өзге ауылдарға немесе аудан орталығына қатынауға мәжбүр еді. Әсіресе қыс мезгіліндегі ауа райы мен жол жағдайы бұл қиындықты одан әрі күрделендіріп, уақытылы медициналық көмек алуға кедергі келтіретін.
Тұрғындардың өтініштері негізінде бұл мәселе «AMANAT» партиясының назарына алды. Партия өкілдері мен депутаттар тарапынан нысан құрылысына тұрақты партиялық мониторинг жүргізіліп, тиісті мемлекеттік органдарға депутаттық сауалдар жолданды. Абай аудандық партиялық бақылау комиссиясының төрағасы Еділ Құдайбергенов құрылыс жұмыстарының сапасы мен мерзімі жіті назарда болғанын атап өтті.
Соның нәтижесінде 2025 жылы Орда ауылындағы медициналық пункт толық іске қосылды.
«Бұрын соңды ауылымызда амбулаториялық пункт болмаған. Бұл ауыл өміріне үлкен өзгеріс әкелді. AMANAT партиясының қолдауымен 2025 жылы салынып, іске қосылды. Халық ризашылығын білдіруде. Дәрігер көмегіне өте мұқтаж жандар бар. Күні-түні жұмыс істейтін мамандарға және атқарылып жатқан жоспарлы жұмыстарға алғысымызды айтамыз», — дейді ауыл тұрғыны Меруерт Игибаева.
Елді мекенде медициналық нысанның болмауы тұрғындарға айтарлықтай қиындық келтірген болатын. Дәрігер қабылдауына қаралу немесе қажетті тексеруден өту үшін өзге елді мекендерге баруға тура келетін. Бұл әсіресе егде жастағы азаматтар мен балаларға қолайсыздық туғызды. Соның салдарынан уақытылы медициналық көмек алу қиындап, тұрғындардың алаңдаушылығы артқан. Қазір елді мекенде амбулаториялық пункттің ашылуы халыққа қажетті медициналық қызметті жақын жерден әрі жедел алуға мүмкіндік беріп отыр.
Ал 70-тен асқан зейнеткер Ысқақ Берікхан соңғы жылдары ауылдағы оң өзгерістерді атап өтті: «AMANAT партиясының араласуымен ауылға жол салынды. Бұрын мұндай инфрақұрылым болмаған. Амбулатория, мектеп салынды, жаңа үйлер бой көтерді. Тіпті бүгін жылжымалы медициналық кешен келіп, ЭКГ, УЗИ диагностикалық тексерулерден өтіп жатырмыз», — дейді ол.
Үш жылда Абай облысында сайлауалды бағдарлама аясында денсаулық сақтау саласында 65 нысан іске қосылып, ауыл тұрғындарының сапалы қызметке қолжетімділігі артып отыр. Орда ауылындағы амбулаториялық пункт — халық сұранысына нақты жауап берген жобалардың бірі. Бүгінде бұл нысан жүздеген тұрғынның тұрмыс жағдайына оң әсер етіп, ауыл халқының денсаулығын нығайтуда маңызды рөл атқаруда.
