Semeytany.kz – Абай облысында арнайы экономикалық аймақ құру бастамасы Үкімет тарапынан қолдау тапты. Бұл мәселе Үкімет отырысында қаралып, өңірдегі инвестициялық ахуалды жақсарту және ірі жобаларды жүзеге асыру бағытындағы жұмыстар талқыланды.
Жиында облыстың инвестициялық мүмкіндіктері мен жүзеге асырылып жатқан жобалардың нәтижелері таныстырылды. Мәліметке сәйкес, 2025 жылдың басынан бері инвестициялық пулдағы жобалар саны 29-дан 112-ге дейін артқан. Ал инвестиция көлемі 2,2 трлн теңгеден 4,3 трлн теңгеге жеткен.
Облыс әкімі Берік Уәлидің айтуынша, келесі жылы жалпы құны 131,2 млрд теңгені құрайтын 41 инвестициялық жобаны іске асыру көзделіп отыр. Соның нәтижесінде өңірде 3 мыңнан астам жаңа жұмыс орны ашылады деп жоспарлануда.
Инвесторлар тарапынан өндірістік алаңдарға сұраныстың артуына байланысты «Өндіріс» индустриялық аймағының көлемі 96 гектардан 190 гектарға дейін ұлғайтылған. Сонымен бірге шағын және орта бизнеске арналған шағын өнеркәсіптік парк салу мүмкіндігі қарастырылуда.
Жоба бойынша арнайы экономикалық аймақтың аумағы бастапқы кезеңде 600 гектарды қамтып, кейін 1000 гектарға дейін кеңейтіледі.
Арнайы экономикалық аймақтың негізгі бағыттары ретінде агроөнеркәсіп, логистика, көлік-хаб қызметтері және өңдеу өнеркәсібі белгіленген. Аталған аумақта бірнеше ірі инвестициялық жобаны жүзеге асыру жоспарланып отыр.
Отырыс қорытындысында Премьер-министр жауапты мемлекеттік органдарға инвесторлардың қажетті рәсімдерден уақытылы өтуіне қолдау көрсетуді тапсырды.
