Semeytany.kz – Семей қаласындағы сауда базарларын жаңғырту және олардың сыртқы келбетін ретке келтіру жұмыстары кезең-кезеңімен жүзеге асырылып жатыр. Бұл мәселе облыс әкімі Берік Уәли төрағалық еткен кеңейтілген аппараттық кеңесте қаралды.
Кәсіпкерлік және индустриялық-инновациялық даму басқармасының басшысы Айбек Рахымбековтің айтуынша, Президент Әкімшілігінің тапсырмасына сәйкес өңірде сауда базарларын жаңғыртуға арналған Жол картасы іске асырылуда.
Қазіргі уақытта «СМОКК» базары бойынша жобалық-сметалық құжаттама әзірленген. Су құбыры мен кәріз желілерін салу жұмыстары аяқталып, техникалық шарттар алынған. Сонымен қатар, контейнерлер мен шатыр құрылымдарын демонтаждау жүргізілуде. Саудагерлердің бір бөлігі «Северный» сауда-логистикалық орталығына және уақытша сауда орындарына көшірілген. Дайындық жұмыстары аяқталған соң құрылыс-монтаж жұмыстары басталады.
Ал «Мереке» базарында құрылыс алаңын дайындау және сауда контейнерлерін алу жұмыстары жүріп жатыр. Құрылыс жұмыстарын маусым-шілде айларында бастау жоспарланған. Кәсіпкерлердің жұмысын тоқтатпау үшін негізгі сауда қатары жұмысын жалғастыруда.
«Ақшың» базарында ғимарат қасбетін сырлау жұмыстары қолға алынған. Сондай-ақ, «Жансая» базары бойынша эскиздік жоба дайындалып, көше бойындағы сауда қатарларын ретке келтіру және қасбетті жаңарту кезең-кезеңімен жүзеге асырылмақ.
Бұдан бөлек, базар аумағындағы контейнерлерді демонтаждау жалғасуда. «Нива» сауда үйінде шатыр жөндеу және сыртқы келбетін жаңарту жұмыстары басталған. Ал «Турист» қонақ үйінің эскиздік жобасы әзірленіп, «Rakhat Palace» қонақ үйі мен «Жақсылық» бизнес орталығында қайта жаңғырту жұмыстары қолға алынды.
Жиын барысында облыс әкімі қала әкімдігі мен жауапты басқармаларға базар маңындағы жол қозғалысы қауіпсіздігін бақылауда ұстауды, заңсыз құрылыстарды анықтау жұмыстарын күшейтуді және Жол картасының уақытылы орындалуын қамтамасыз етуді тапсырды.
«Сауда нысандарын жаңғырту жұмыстары тұрақты бақылауда болуы тиіс. Бірқатар нысанда оң өзгерістер байқалады. Сонымен қатар, инженерлік инфрақұрылым, қаржыландыру және құрылыс қарқынын жеделдету мәселелері де өзекті болып отыр. Бұл жұмыстар аудан орталықтарындағы сауда нысандарында да назардан тыс қалмауы керек», – деді Берік Уәли.
