Semeytany.kz – Абай облысының әкімі Берік Уәли төрағалық еткен кеңейтілген аппараттық кеңесте өңірдегі өрт қаупі бар маусымның өтуі, сауда нысандарының жағдайы және базарларды жаңғырту мәселелері қаралды.
Кеңеске облыстық басқарма басшылары, өңірлік департамент жетекшілері қатысып, аудан және қала әкімдері бейнережим арқылы қосылды. Күн тәртібіндегі мәселелер бойынша Төтенше жағдайлар департаменті Мемлекеттік өрт бақылау басқармасының бастығы Бауыржан Аринов, «Семей орманы» мемлекеттік орман табиғи резерватының басшысы Қазбек Әметов және кәсіпкерлік және индустриялық-инновациялық даму басқармасының басшысы Айбек Рахымбеков баяндама жасады.
Мәліметке сәйкес, өрт қаупі бар маусым басталғалы облыс аумағында жалпы көлемі 45 гектарды құрайтын 19 орман өрті тіркелген. Бұл өткен жылмен салыстырғанда 29,6 пайызға төмен көрсеткіш. Қазір өңірде 38 ведомствоаралық мобильді топ жұмыс істеп жатыр. Рейд барысында өрт қауіпсіздігі талаптарын бұзған 77 адам әкімшілік жауапкершілікке тартылып, 3,1 миллион теңгеден астам айыппұл салынған.
Облыста ғарыштық мониторинг пен авиациялық бақылау жүйесі ұйымдастырылған. Сонымен қатар «Ауыл құтқарушылары» бағдарламасы аясында ашылған 76 өрт бекеті жұмыс істеп тұр. Биыл тағы 45 бекетті ашу және жаңғырту жоспарланып отыр.
Кеңесте «Семей орманы» резерватының жұмысы да талқыланды. Қазір резерватта 30 орман өрт сөндіру станциясы жұмыс істейді. Өрт сөндіру қызметінде 726 адам еңбек етеді. Соңғы жылдары материалдық-техникалық база жаңартылып, биыл өрт сөндіру жабдықтары мен байланыс жүйелерін жетілдіруге қаржы бөлінген. Бұдан бөлек, 33 экшн-камера, 35 дүрбі, 1 квадроцикл сатып алу жоспарланған. Лизинг арқылы 35 патрульдік көлік пен 5 квадроцикл алу көзделіп отыр.
Аймақ басшысы өрт қаупі бар кезең ерекше бақылауда екенін атап өтті.
«Соңғы жылдардағы табиғи-климаттық жағдайлар, күннің күрт ысуы мен құрғақшылық орман және дала өрттерінің қаупін күшейтіп отыр. Сондықтан барлық жауапты мекемелер үйлесімді әрі жедел жұмыс істеуі қажет. Төтенше жағдайлар департаменті күшейтілген режимде жұмыс атқарып, өрттің алдын алу шараларын тұрақты жүргізуі керек», – деді облыс әкімі.
Жиын қорытындысында қала және аудан әкімдіктеріне минералдандырылған жолақтарды уақытылы дайындау, өрт сөндіру бекеттерін жаңғырту, қоқыс полигондарын қауіпсіздік талаптарына сәйкестендіру, ауыл шаруашылығы алқаптарындағы өрт қаупін бақылауды күшейту және жарамсыз техникаларды қысқа мерзімде жөндеу тапсырылды. Сонымен қатар табиғи ресурстар басқармасы мен «Семей орманы» резерватына орман өртін ерте анықтау жүйесін жетілдіру, патрульдеу мен мониторингті күшейту, суаттар мен байланыс жүйелерін жаңғырту міндеті жүктелді.
