Semeytany.kz — Абай облысының әкімі Берік Уәли Жаңасемей ауданына жұмыс сапары барысында Талица ауылындағы ауыз су құбырының іске қосылу рәсіміне қатысты.
Жоба аясында ауылда 9,5 шақырым су құбыры тартылып, 104 су құдығы мен 23 өрт гидранты орнатылды. Сонымен қатар мектеп аумағына өртке қарсы резервуар қойылып, сыйымдылығы 60 текше метр болатын екі су қоймасы салынды.
Ауыз су жүйесінің тұрақты жұмыс істеуі үшін электр желілері жүргізіліп, трансформатор мен дизельдік генератор орнатылған. Насостық станция да іске қосылды. Нәтижесінде 98 тұрғын үй мен Талица орта мектебі орталықтандырылған ауыз су жүйесіне қосылды.
Облыс әкімі жауапты мекемелер мен мердігер ұйымдарға атқарылып жатқан жұмыстарды тұрақты бақылауда ұстауды тапсырды.
Берік Уәлидің айтуынша, былтыр Талица ауылына барған сапарында тұрғындар таза ауыз су мәселесін көтерген. Енді сол мәселе шешімін тауып, ауыл халқы сапалы ауыз суға қол жеткізіп отыр.
Аймақ басшысы ауыл тұрғындары көтерген тағы бір өзекті мәселе интернет екенін атап өтті. Қазіргі уақытта қажетті қаражат бөлініп, екі ауылды интернет желісіне қосу бойынша конкурстық рәсімдер жүргізілуде. Жоспар бойынша қыркүйек айында ауылдар толықтай интернетпен қамтылады.
Айта кетейік, Жаңасемей ауданында ауыз суға қолжетімділікті арттыру мақсатында 8 елді мекенде блок-модульдік станциялар орнатылған. Олардың қатарында Шоптығақ, Қыземшек, Жазық, Баженово, Климентьевка, Қаракөл және Самай ауылдары бар.
