Semeytany.kz – Қазақстан Республикасы Ғылым және жоғары білім министрлігінің Тіл саясаты комитеті «Мемлекеттік тіл және БАҚ» республикалық байқауын жариялады. Байқаудың мақсаты – бұқаралық ақпарат құралдарында мемлекеттік тілді насихаттау, қазақ тіліндегі контенттің үлесін арттыру және тіл саясатының өзекті мәселелерін кеңінен көтеру.
Байқауға кәсіби журналистер, теле-радио саласының өкілдері, газет пен сайт ұжымдары, сондай-ақ мемлекеттік тіл мәселесіне арналған материалдар жариялаған өзге де мамандар қатыса алады.
Байқау екі номинация бойынша өтеді:
– «Үздік мақала»;
– «Үздік теле/радиобағдарлама».
Қатысу үшін үміткерлер 2026 жылғы 1 қаңтар мен 1 шілде аралығында жарияланған 2 мақала немесе 1 теле/радиобағдарламаны ұсынуы қажет. Сонымен қатар материалдардың Word форматындағы нұсқалары, скриншоттары және бағдарламалардың жазбасы қоса жіберіледі.
Өтінімдер 2026 жылғы 1 шілде сағат 24:00-ге дейін қабылданады. Құжаттар қол қойылған және сканерленген түрде til.jane.baq@gmail.com электронды поштасына «Мемлекеттік тіл және БАҚ» республикалық байқауына» деген белгімен жолдануы тиіс.
Ұйымдастырушылардың мәліметінше, байқау материалдары бірнеше талап бойынша бағаланады. Атап айтқанда, тақырыптың өзектілігі, ақпараттың нақтылығы мен шынайылығы, мәселені талдау деңгейі және материалды жеткізу шеберлігі ескеріледі.
Сондай-ақ қатысушылардың мультимедиалық сторителлинг, заманауи медиа құралдарын пайдалану, дата-журналистика мүмкіндіктерін қолдану қабілеттеріне де назар аударылады. Материалдарда мемлекеттік тілдің қоғамдағы рөлін арттыру, қазақ тілінің қолданылу аясын кеңейту және кездесетін кедергілерді шешу жолдары қамтылуы тиіс.
Байқау жеңімпаздары арнайы дипломдармен, алғысхаттармен және қаржылай сыйлықтармен марапатталады.
Байланыс телефоны: 8-777-114-66-83.
