Semeytany.kz – Astana AI Film Festival халықаралық AI-фильмдер байқауына әлемнің түкпір-түкпірінен өтінім қабылдау басталды. Фестивальдің ресми сайты – Astana AI Film Festival платформасында креаторлар өз жұмыстарын жолдай алады.
Астанада өткен баспасөз конференциясында фестивальдің тұжырымдамасы, байқау бағдарламасы және өткізу тәртібі таныстырылды. Ұйымдастырушылардың айтуынша, конкурс екі бағыттан тұрады. Оның бірі – «The future worth living in» («Өмір сүруге тұрарлық болашақ») тақырыбындағы негізгі секция болса, екіншісі – режиссура, визуалды тіл, оқиға, концепция және кейіпкер номинацияларын қамтитын ашық секция.
Фестиваль ұйымдастырушысы Алмас Жәли байқаудың басты ерекшелігі фильмдердің толықтай жасанды интеллект технологиялары арқылы жасалуы екенін айтты. Яғни AI тек қосымша құрал емес, шығарманы жасаудың негізгі тетігі болуы тиіс.
Фестиваль 2026 жылғы 28 қыркүйек пен 1 қазан аралығында Астанада Astana AI Week аясында өтеді. Ұйымдастырушылар бұл қадам халықаралық деңгейдегі технологиялық алаң қалыптастыруға мүмкіндік береді деп отыр.
Байқауға қатысу тегін. Жас ерекшелігіне немесе кәсіби тәжірибесіне шектеу қойылмайды. Қатысушылар ұзақтығы 10 минутқа дейінгі қысқаметражды AI-фильм түсіріп, оны жобаның сипаттамасымен бірге фестиваль платформасына жүктеуі керек.
Жоба авторларының бірі Айзатулла Хуссейн жұмыстарды YouTube немесе Google Drive арқылы жіберуге болатынын мәлімдеді. YouTube-қа жүктелген видеоларда міндетті түрде «Special for Astana AI Film Festival» тіркесі, автордың аты-жөні және #SpecialForAAIFF хэштегі көрсетілуі тиіс.
Іріктеу нәтижесінде негізгі секциядан 10, ал ашық секциядан 15 жұмыс финалға өтеді. Жеңімпаздарды киноиндустрия, AI-қоғамдастық және creative tech саласының халықаралық сарапшыларынан құралған қазылар алқасы анықтайды.
Өтінім қабылдау 2026 жылғы 15 тамызға дейін жалғасады. Финалистер қыркүйек айында жарияланып, жеңімпаздарды марапаттау рәсімі Astana AI Week аясында өтеді.
Фестивальдің жалпы жүлде қоры 1 миллион АҚШ долларын құрайды. Сонымен қатар іс-шара барысында AI-контентке арналған конференциялар, панельдік пікірталастар және авторлар мен продюсерлерге арналған pitch-сессиялар ұйымдастырылады.
