Абай облысы Семей қаласындағы Ломоносов көшесі, 24-үй тұрғындары бірнеше жылдан бері жаз мезгілінде тұрмыстық қолайсыздықпен бетпе-бет келіп келген. Тұрғындардың айтуынша, үйге іргелес орналасқан «BigBen» кафесінің мангал аймағынан шығатын түтін мен жағымсыз иіс кешкі уақытта терезе ашуға мүмкіндік бермей, тіпті түтін тұрғын үйлердің ішіне дейін тараған. Бұл жағдай әсіресе балалар мен қарттардың денсаулығына алаңдаушылық туғызған.
Осы мәселе бойынша тұрғындар «Тұрғындар аманаты» жобасы аясында «AMANAT» партиясының Абай облыстық филиалының қоғамдық қабылдау бөлмесіне жүгінген. Көп жылдан бері шешілмей келген түйткіл партия тарапынан назарға алынып, бірден тиісті жұмыс жүргізілген. Партия өкілдері мәселені зерделеу мақсатында мемлекеттік органдарға ресми хаттар жолдап, санитариялық-эпидемиологиялық талаптардың сақталуы, мангал аймағының заңдылығы және түтін шығару жүйесінің тиімділігі бойынша тексеріс жүргізу қажеттігін көтерген. Сонымен қатар, тұрғындармен арнайы кездесу ұйымдастырылып, жағдай жергілікті жерде қаралған.
Жүргізілген жұмыстардың нәтижесінде бүгінгі күні аталған мәселе оң шешімін тапты. Түтін мен жағымсыз иіс тудыратын жағдайлар ретке келтіріліп, тұрғындардың қалыпты өмір сүруіне кедергі болған факторлар жойылды. Нәтижесінде тұрғындар үшін бұрынғыдай қолайсыздық тудырған кешкі уақытта терезе ашу қайтадан қалыпты жағдайға айналды.
Қала тұрғыны Мұрат Түсіпов өз пікірінде: «Бұл мәселе көп жылдан бері тұрғындарды алаңдатып келген еді. Шынымды айтсам, оның шешілетініне сенім аз болды. Алайда “AMANAT” партиясының жедел араласуының арқасында мәселе оң шешімін тапты. Бүгінде түтін мен жағымсыз иіс жойылып, тұрғындар қайтадан терезелерін ашып отыр. Осы нәтижеге қол жеткізгенімізге қуаныштымыз, алғысымызды білдіреміз», – деді.
Тұрғындар «AMANAT» партиясының уақтылы араласқаны үшін алғыстарын білдіріп, бұдан бөлек басқа да бірқатар өзекті мәселелер бар екенін жеткізді. Атап айтқанда, көпқабатты үйлерде мүлік иелері бірлестігі (ОСИ) және пәтер иелері кооперативі (КСК) жүйелерінің құрылмауы салдарынан тұрғын үйді басқару және коммуналдық мәселелерді шешу қиындап отырғаны айтылды.
Аталған өтініштер де назарға алынып, алдағы уақытта «Тұрғындар аманаты» жобасы аясында және тұрғын үй-коммуналдық шаруашылық бөлімімен бірлесіп құқықтық және ұйымдастырушылық қолдау көрсету, МИБ/ПИК мәселесін реттеу бағытында жұмыстар жалғастырылатыны хабарланды. «Басты мақсат – бір ғана мәселені шешу емес, тұрғындардың өмір сапасына әсер ететін барлық жүйелі түйткілдерді кезең-кезеңімен реттеу. Тұрғындардың әрбір өтініші біз үшін нақты әрекетке негіз болады», – деп атап өтті партия филиалының қоғамдық қабылдау бөлімінің меңгерушісі Алинур Бекенов.
