Semeytany.kz – Семей қаласындағы Бейбітшілік аралында орналасқан «Өлімнен де күшті» монументі мен оған іргелес аумақты қайта жаңғырту жұмыстары толық аяқталды. Жүргізілген жұмыстардың нәтижесімен облыс әкімі Берік Уәли танысты.
Жаңғырту жұмыстары 15 сәуірде басталып, 1 маусымда аяқталған. Жобаның мақсаты – тарихи-мәдени нысанның келбетін жаңартып, тұрғындар мен қала қонақтарына қолайлы демалыс аймағын қалыптастыру.
Жоба аясында 10 мың шаршы метр аумақтағы тас төсемдері толық ауыстырылып, заманауи брусчатка төселді. Сонымен қатар «Өлімнен де күшті» монументі мен Бейбітшілік стелласы қалпына келтірілді. Аумаққа ұзындығы 300 метр болатын автоматты суару жүйесі орнатылып, сыртқы жарықтандыру желілері жаңартылды. Кешеннің кіреберісі қайта жасақталып, 500 шаршы метрден астам жерге гүлзарлар егілді.
Қазір осы аумақта Мемлекет басшысының қолдауымен қолға алынған «Абайға құрмет» акциясы аясында Рәміздер алаңының құрылысы жалғасуда. Болашақ нысанда ұлттық рәміздерге арналған арнайы композиция мен үш таған орнатылады.
Облыс әкімі жаңартылған аумақты аралау барысында бұл орынның тарихи әрі рухани маңызы ерекше екенін атап өтті. Оның айтуынша, Бейбітшілік аралындағы қоғамдық кеңістік табиғи ерекшелігі мен тарихи құндылығы қатар тоғысқан бірегей орындардың бірі саналады.
Қазіргі таңда Рәміздер алаңының құрылысы қарқынды жүргізілуде. Нысанды Абайдың туған күні қарсаңында пайдалануға беру жоспарланып отыр.
