Semeytany.kz – Семей қаласының санитарлық тазалығына жауапты «Зеленстрой» ЖШС жаңа арнайы техникалармен толықты. Облыс әкімі Берік Уәли кәсіпорынға барып, техникалық базаның жағдайымен және жаңадан алынған көліктермен танысты.
2008 жылдан бері жұмыс істеп келе жатқан кәсіпорын бүгінде қаланы күтіп-ұстау, көгалдандыру және абаттандыру жұмыстарымен айналысады. Мекемеде 526 адам еңбек етеді, ал арнайы техникалардың жалпы саны 94 бірлікті құрайды.
Облыс әкімінің тапсырмасына сәйкес, Семейдегі коммуналдық қызмет көрсететін ұйымдар материалдық-техникалық базаларын жаңартып жатыр. Бұл жұмыстар қаланың тазалығын сақтау, көшелерді күтіп ұстау және тұрғындарға көрсетілетін қызмет сапасын арттыру мақсатында жүзеге асырылуда.
Осы бағытта «Зеленстрой» серіктестігі төрт заманауи вакуумды-сыпырғыш техника мен үш қоқыс тасымалдайтын арнайы көлік сатып алған.
Берік Уәли техникалық паркті жаңарту коммуналдық қызметтердің тиімділігін арттыратынын атап өтті. Оның айтуынша, «Таза Қазақстан» бағдарламасы аясында өңірде ауқымды жұмыстар жүргізіліп, коммуналдық мекемелердің материалдық-техникалық мүмкіндіктері кезең-кезеңімен күшейтіліп келеді.
Сондай-ақ кәсіпорын алдағы уақытта тағы 14 арнайы техника сатып алуды жоспарлап отыр. Олардың қатарында жыл бойы жұмыс істейтін 10 комбинирленген жол машинасы, бір автогрейдер, бір тиегіш және екі тротуар тазалайтын техника бар. Бұл жаңартулар қаланың санитарлық жағдайын жақсартуға және коммуналдық қызметтердің жұмысын жеделдетуге мүмкіндік береді.
