Semeytany.kz – Абай облысының әкімі Берік Уәли Семей қаласындағы жол жөндеу және жаяу жүргіншілер жолын салу жұмыстарының барысымен танысты.
Аймақ басшысы алдымен Мичурин көшесіндегі орташа жөндеу жұмыстарын көрді. Жоба аясында жол негізін нығайту, асфальтбетон жабындысының төменгі және жоғарғы қабаттарын төсеу, жол жиектерін бекіту, инженерлік коммуникация құдықтарын ретке келтіру жұмыстары жүргізілуде. Қазіргі уақытта ұзындығы 2,5 шақырымнан асатын көшеде асфальттың бірінші қабаты төселген. Жөндеу жұмыстары маусым айының соңына дейін аяқталуы тиіс.
Берік Уәлидің айтуынша, Мичурин көшесінің жағдайына қатысты тұрғындардан көп өтініш түскен. Бұған дейін бұл көшеде бордюр, жарық бағандары мен жаяу жүргіншілер жолы болмаған. Биыл аталған мәселелер толық ретке келтіріледі.
Сондай-ақ облыс әкімі Северный промузел көшесінен Қарағайлы шағын ауданына дейін салынып жатқан жаяу жүргіншілер жолының құрылысын қарады. Ұзындығы 1,5 шақырым болатын учаскедегі жұмыстар қалалық бюджет есебінен жүргізілуде. Құрылыс мамыр айында басталған, оны тамыз айының соңына дейін аяқтау жоспарланған.
Аймақ басшысы жол және жаяу жүргіншілер инфрақұрылымын дамыту тұрғындардың өмір сүру сапасына тікелей әсер ететінін атап өтті. Оның сөзінше, Семейдің көптеген көшелерінде бұрын жаяу жүргіншілер жолы мүлде болмаған. Әсіресе көктем мезгілінде тұрғындар батпақ пен су кешіп жүруге мәжбүр болған. Осыған байланысты қалада жаяу жүргіншілер жолын ретке келтіруге ерекше көңіл бөлініп отыр.
Бұдан бөлек, Берік Уәли Шәкәрім даңғылындағы Дулатов көшесінен Гагарин көшесіне дейінгі аралықта салынып жатқан жаяу жүргіншілер жолының құрылысымен танысты. Ұзындығы 680 метр болатын учаскеде тұрғындардың қауіпсіз әрі қолайлы қозғалысы үшін заманауи талаптарға сай жол төселуде. Бұған дейін бұл аумақтағы ескі жаяу жүргіншілер жолын жиі су басқан. Қазір жол жаңартылып, 20 сантиметрге биіктетілді.
Айта кетейік, былтыр облыс орталығындағы 20-ға жуық көшеде жаяу жүргіншілер жолы жаңадан салынған. Биыл Семейде 40-қа жуық көшеде жаяу жүргіншілер жолы салынып, жаңартылады.
