Абайдың мемлекеттік қорық-мұражайының қызметкерлері «Шығыс» өңірлік қолбасшылығының қарамағындағы 28738 әскери бөлімінде «Отан үшін от кешкен Абай ұрпақтары» атты мерекелік шара өткізді.
{jcomments on}Жеңістің 70 және хакім Абайдың 170 жылдығына орай өткізілген іс-шараны ұйымдастыруға «Шығыс» өңірлік қолбасшылығының қолбасшысы, генерал-майор М.Бектанов және мемлекеттік тілді дамыту бөлімінің бастығы Ф. Ахметов қолдау жасады.
Шара барысында әскери қызметшілер мен сарбаздарға мұражайдың жетекші ғылыми қызметкері Н. Өмірбекова «Ұлы Отан соғысына қатысқан Абай ұрпақтары» атты баяндама жасап, бейнебаян көрсетті. Мұражай ғылыми қызметкері Р. Елекенова «Абай әлемі» және «Отан үшін от кешкен Абай ұрпақтары» көрмелерін ұйымдастырып, экскурсиялар жүргізді.
Көрменің мақсаты — соғыста елімізді зұлым жаудан қорғап, қан майданда ерлік көрсеткен батырлардың, соның ішінде Абай ұрпақтары Ишағы Жағыпарқызы, Жошыхан Жағыпарұлы Мағауин, Берекехан Құтайбаұлы және тағы басқа ұрпақтарының ерліктерін таныстыру, дәріптеу. Абай ұрпақтары сияқты отансүйгіш жастарды тәрбиелеп, сарбаздардың бойына патриоттық сезімді сіңіру. Сондай-ақ Абай өмірі мен шығармашылығын насихаттау, мұражайдың бүгінгі тыныс-тіршілігімен таныстыру.
Көрмеде әскери қызметшілер мен сарбаздар мұражай қорында сақталған Абай ұрпақтарының майданнан жазған үшбу хаттары, қайтыс болғандары туралы хабарламалар, И.Жағыпарқызының өз қолымен жазған өмірбаяны, фотосуреттерін тамашалады.
Жеңіс күні мерекесі аясында ұйымдастырылған шарада Мемлекеттік тілді дамыту бөлімінің бастығы Ф.Ахметов ұжым атынан ризашылықтарын білдіріп, Абай қорық-мұражай ұжымы «Шығыс» өңірлік қолбасшылығының қолбасшысы, генерал-майор М.Бектановтың алғыс хатымен марпатталды.
Р. ЕЛЕКЕНОВА,
Абайдың мемлекеттік
қорық-мұражайының ғылыми қызметкері.
