Көктем шыға қалада жол жөндеу жұмыстары қолға алынып, ең алдымен негізгі деген көшелер қалыпқа келтіріле бастаған еді. Бүгінде бұл жұмыстар жалғасын тауып, жөндеу жұмыстары қарқын алды. Осы мақсатта ағымдағы жөндеу жұмыстарына 100 млн. теңге бөлінген. Бұл 33 мың шаршы метрден астам тас жолды қалыпқа келтіруге жеткілікті.
{jcomments on}Семейде жол жөндеумен мемлекеттік тапсырыс бойынша өткізілген байқаудың қорытындысы бойынша «Гордорстрой» ЖШС айналысады. Мердігер мекеме бұл жұмыстарды маусым айының аяғына дейін жүргізбек. Семей қалалық ТҮКШ бөлімінің сектор меңгерушісі Жанна Шаймұратованың айтуынша, жөндеу жұмыстары қоғамдық көлік қатынайтын негізгі көшелерде атқарылмақ.
— Бүгінгі күні Қабанбай батыр, Интернационал, Ш.Уәлиханов көшелері мен Өскемен қаласына шыға беріс жолдар жөнделіп бітті. Қазір Абай көшесі мен Шәкәрім даңғылы қалыпқа келтірілуде. Алдағы уақытта осындай жұмыстар Шмидт көшесінде де басталады. Негізінен, қоғамдық көлік қатынайтын бағыттарға баса назар аударылып отыр, — дейді Ж.Шаймұратова.
Сала маманының айтуынша, бүгінде шаһарда 18 мың шаршы метрден астам жолға асфальт төселді. Бұл — шамамен орындалған жұмыстың 60 пайызы. Сонымен қатар қалалық ТҮКШ бөлімінің сұранысымен орташа жөндеу жұмыстарына да қаражат бөлінген. Оған Би Боранбай көшесіне жөндеу жұмыстары жүргізіледі.
Көктем шыға қаланың көркіне де ерекше мән беріліп, шаһарға айрықша әр мен көрік беретін гүлдер мен гүлзарлар, түрлі көшеттер отырғызылуда. Қала тазалығына екі айлық сенбілік шаралары да үлкен септігін тигізуде. Бұл қаланы көгалдандыру жұмыстарына серпін бермек.
— Қаланы көгалдандыру мақсатында жыл сайын гүлзарлар орнатылады. Алдағы уақытта да ағаштарды суғару, кепкен ағаштарды кесу сияқты жұмыстар атқарылады. Айта кетуіміз керек, биылғы жылы гүлзарлар отырғызуға көбірек қаражат бөлінді. Бұған қоса биылғы жылы шырша отырғызуға да қаражат қарастырылған. Қала бойынша 110 шырша отырғызылса, оның 35-і канадалық, қалғандары сібірлік шыршалар.
Асан МЫРЗАХАНОВ,
«Семей таңы»
