Туристік маусымның қызған шағы қарсаңында Абай облысы бойынша Мемлекеттік кірістер департаменті Алакөл жағалауында кәсіпкерлік қызметті заң талаптарына сай жүргізуге бағытталған ақпараттық-түсіндіру жұмыстарын күшейтті.
Осы мақсатта департамент басшысының орынбасары Азамат Мұсабеков пен камералдық мониторинг басқармасының басшысы Еркежан Буркутова Мақаншы ауданы бойынша мемлекеттік кірістер басқармасының мамандарымен бірге өңір кәсіпкерлерімен көшпелі кездесу өткізді.
Кездесу барысында бизнес өкілдеріне жаңа Салық кодексінде қарастырылған өзгерістер, салықтық әкімшілендірудің ерекшеліктері, арнайы салық режимдерін қолдану тәртібі, бақылау-касса машиналары мен POS-терминалдарды пайдалану талаптары жан-жақты түсіндірілді. Сонымен қатар жалдамалы қызметкерлерді ресми тіркеу, салық міндеттемелерін орындау және кәсіпкерлік қызметті ашық жүргізудің артықшылықтары туралы ақпарат берілді.
Кәсіпкерлер өздерін толғандырған сұрақтарын қойып, мемлекеттік кірістер органдарының мамандарынан нақты түсініктемелер мен тәжірибелік кеңестер алды. Мамандар жаңа Салық кодексінің нормаларын қолдану тәртібін түсіндіріп, кездесуге қатысушылардың өтініштеріне жауап берді.
Бүгінде Алакөл жағалауында 329 салық төлеуші кәсіпкерлік қызметпен айналысады. Аймақта деректерді тіркеу және беру функциясы бар 347 бақылау-касса машинасы мен 136 POS-терминал тіркелген.
Департамент мәліметінше, 2025 жылы жүргізілген түсіндіру және бақылау жұмыстарының нәтижесінде 74 азамат жеке кәсіпкер ретінде тіркеліп, 91 жалдамалы қызметкер заңды түрде рәсімделген. Сонымен қатар кәсіпкерлердің жалпы табысы шамамен 2,4 млрд теңгеге артқан.
Алайда салық заңнамасын бұзғаны үшін 348 кәсіпкерлік субъектісі әкімшілік жауапкершілікке тартылған.
Мемлекеттік кірістер департаменті алдағы уақытта да Алакөл жағалауында ақпараттық-түсіндіру және бақылау шараларын қатар жүргізіп, кәсіпкерлік қызметті заңдастыру, салықтық сауаттылықты арттыру және өңірдегі қолайлы бизнес ортаны дамыту бағытындағы жұмыстарын жалғастыратынын атап өтті.
