Цифрлық технологиялар дәуірінде ғылымды дамыту тек зерттеу жүргізумен ғана шектелмейді. Заманауи университеттер үшін ғылыми деректерді тиімді талдау, болашақтағы зерттеу бағыттарын болжау және ғылыми әлеуетті стратегиялық тұрғыдан басқару маңызды міндеттердің біріне айналды. Осы бағытта елімізде жүзеге асырылып жатқан AI-Sana ұлттық бағдарламасы аясында Шәкәрім университетінде білім беру және кампусты басқару саласындағы әртүрлі мәселелерді шешуге арналған 11 мамандандырылған AI агенттері бар.
Бағдарлама шеңберінде құрылған агенттердің бірі – Shakarim AI Research Intelligence интеллектуалды жүйесі. Бұл – университеттің ғылыми қызметін жаңа деңгейге көтеруге бағытталған, ғылыми деректерді кешенді талдайтын және ғылыми шешімдер қабылдауға қолдау көрсететін заманауи аналитикалық платформа.
Жүйенің басты ерекшелігі – ғылыми ақпаратты жинақтап қана қоймай, оны терең талдап, болашақтағы мүмкіндіктер мен даму бағыттарын анықтай алуында. Shakarim AI Research Intelligence университеттің ғылыми еңбектері, диссертациялық зерттеулері және ғылыми жобалары жинақталған бірыңғай цифрлық деректер қорын пайдалана отырып жұмыс істейді. Сонымен қатар, жүйе халықаралық ғылыми кеңістіктегі үрдістерді бақылап, ашық ғылыми платформалардағы, кәсіби қауымдастықтардағы және салалық ресурстардағы мәліметтерді саралайды.
Осындай ауқымды талдау нәтижесінде жүйе ғылымның қай бағыттарының қарқынды дамып жатқанын, қандай ғылыми мектептердің қалыптасып келе жатқанын, қандай тақырыптардың өзектілігі артып отырғанын анықтайды. Бұл университеттің ғылыми әлеуетін бағалауға ғана емес, жаңа зерттеу мүмкіндіктерін дер кезінде көруге де мүмкіндік береді.
Shakarim AI Research Intelligence ғылыми бағыттардың эволюциясын бақылап, пәнаралық зерттеулердің даму әлеуетін бағалайды. Нәтижесінде университет алдында тұрған ғылыми міндеттер мен келешектегі зерттеу басымдықтары нақты деректер негізінде қалыптасады.
Жүйе дайындайтын аналитикалық шолулар, трендтік карталар және ұсынымдар университет басшылығына, ғылыми құрылымдарға және ғылыми кеңестерге стратегиялық шешімдер қабылдау кезінде маңызды құрал ретінде қызмет етеді.
Маңыздысы, Shakarim AI Research Intelligence адам факторын алмастыруды мақсат етпейді. Яғни жүйе түпкілікті шешім қабылдамайды, керісінше ғылыми және басқарушылық шешімдердің сапасын арттыру үшін қажетті деректер мен талдау нәтижелерін ұсынады.
AI-Sana ұлттық бағдарламасы аясында жүзеге асырылып жатқан бұл бастама университеттің ғылыми әлеуетін жаңа деңгейге көтеріп қана қоймай, ғылымды басқарудың интеллектуалды мәдениетін қалыптастыруға жол ашады.
Шәкәрім университетінің баспасөз қызметі
