Абай облысында әскери міндеттілерді кезекті әскери жиынға шақыру науқаны басталды. Бұл туралы Өңірлік коммуникациялар қызметінде өткен брифингте Абай облысының қорғаныс істері жөніндегі департаментінің жұмылдыру ресурстарын тағайындау бөлімінің бастығы, подполковник Сымбат Имашев мәлімдеді.
Спикердің айтуынша, әскери жиындардың негізгі мақсаты – бейбіт уақытта қысқартылған құрамда ұсталатын әскери бөлімдердің жауынгерлік және жұмылдыру әзірлігін арттыру, сондай-ақ әскери дайындықтан өткен резервті қалыптастыру.
Биыл облыстан әскери жиындарға 825 азамат шақырылады. Бұл өткен жылмен салыстырғанда айтарлықтай көп. Жиындар 2026 жылдың жазында Аягөз қаласындағы «Майлина» оқу-жаттығу полигонында өтеді және 30 күнге созылады.
— Әскери жиындар әскери міндетті азаматтардың бұрын алған білімдері мен дағдыларын жетілдіруге мүмкіндік береді. Дайын әскери резерв – ел қауіпсіздігін қамтамасыз етудің маңызды құрамдас бөлігі, – деді Сымбат Имашев.
Сондай-ақ брифинг барысында Абай гарнизоны әскери бөлімінің командирінің тәрбие және идеологиялық жұмыс жөніндегі орынбасары – бөлім бастығы, майор Талғат Мақсұтов Жарма ауданында ұйымдастырылған 10 күндік оқу-жаттығу жиыны туралы айтты.
— Он күндік жиынның басты мақсаты – азаматтардың әскери машықтарын жетілдіру, олардың төтенше жағдайлар мен жұмылдыру кезеңіндегі іс-қимылдарға дайындығын арттыру, – деді Талғат Мақсұтов.
Жиынға шақырылған азаматтар мотоатқыштар, танк, артиллериялық және қамтамасыз ету бөлімшелерінде даярлықтан өтеді. Олар әскери қызметшілермен тең дәрежеде киім-кешекпен, тамақпен және медициналық қызметпен қамтамасыз етіледі.
Сонымен қатар, әскери жиын кезінде азаматтардың жұмыс орны мен атқаратын қызметі сақталады. Оларға орташа жалақы төленсе, жұмыссыз азаматтарға мемлекет есебінен ең төменгі жалақы қарастырылған.
Мамандардың айтуынша, әскери жиындар азаматтардың әскери даярлығын арттырып қана қоймай, елдің қорғаныс қабілетін нығайтуға да өз үлесін қосады.
