Конституциялық реформалар – Қазақстандағы саяси жаңғырудың маңызды кезеңі. Негізгі мақсат – мемлекеттік басқаруды жетілдіру, билік тармақтарының тепе-теңдігін қамтамасыз ету және азаматтардың құқықтарын қорғауды күшейту.
Реформалар аясында Президенттің өкілеттік мерзімі жеті жылдық бір кезеңмен шектелді, Парламент пен мәслихаттардың ықпалы артты. Конституциялық Сот құрылып, әрбір азаматқа өзінің конституциялық құқықтарын қорғау үшін тікелей жүгіну мүмкіндігі берілді.
Сонымен қатар ауыл әкімдерін тікелей сайлау тәжірибесі кеңейіп, жергілікті өзін-өзі басқару жүйесі нығая түсті. «Халық үніне құлақ асатын мемлекет» қағидаты мемлекеттік органдардың ашықтығы мен қоғам алдындағы жауапкершілігін күшейтуге бағытталған.
Бұл өзгерістердің түпкі мақсаты – заң үстемдігіне негізделген, азаматтардың құқығы қорғалатын әрі мемлекет пен қоғам арасындағы сенім нығайған Әділетті Қазақстанды қалыптастыру. Конституциядағы әрбір жаңашылдық елдің тұрақты дамуына және әр азаматтың мемлекет өміріне белсенді қатысуына жол ашады.
