Қазақстан Республикасы Жаңа Конституциясының күшіне енуіне байланысты «Ақ жол» демократиялық партиясы арнайы мәлімдеме жасап, бұл оқиғаны ел тарихындағы маңызды кезеңдердің бірі ретінде бағалады.
Партияның мәлімдеуінше, жалпыхалықтық референдумда қабылданған Жаңа Конституция Қазақстанның мемлекеттік дамуындағы жаңа кезеңнің басталуына негіз қалап, саяси, экономикалық және қоғамдық жаңғыруларға жол ашады. Сондай-ақ бүгіннен бастап Конституция қағидаттарын іс жүзінде жүзеге асыру кезеңі басталып, олар мемлекеттік шешімдер мен жүргізілетін саясаттың негізгі тірегіне айналуы тиіс екені атап өтілді.
Мәлімдемеде Конституцияның парламентаризмді дамытуға, саяси бәсекелестікті күшейтуге, тәуелсіз сот жүйесін нығайтуға, жеке меншікті қорғауға, экономикалық еркіндікті қамтамасыз етуге және азаматтардың құқықтары мен бостандықтарының конституциялық кепілдіктерін бекемдеуге бағытталғаны айтылған. Бұл қағидаттар «Ақ жол» партиясының ұзақ жылдар бойы көтеріп келе жатқан негізгі ұстанымдарымен үндес екені де көрсетілді.
Партия өкілдері елдің тұрақты дамуы үшін демократиялық институттарды нығайту, мемлекеттік басқарудың тиімділігін арттыру және заң үстемдігін қамтамасыз ету маңызды екенін жеткізді. Сонымен қатар қоғамда әділдік, жауапкершілік, заңдылық, еңбекқорлық пен отаншылдық құндылықтарын орнықтыру реформалардың табысты жүзеге асуына ықпал ететіні атап өтілді.
«Ақ жол» демократиялық партиясы алдағы уақытта да заңнаманы жетілдіруге, азаматтардың құқықтары мен отандық кәсіпкерлікті қорғауға белсенді қатысып, конституциялық қағидаттардың толық орындалуына үлес қоса беретінін мәлімдеді.
Мәлімдеме соңында партия барша қазақстандықтарды Жаңа Конституцияның күшіне енуімен құттықтап, елімізге бейбітшілік, бірлік, тұрақты даму және мол табыс тіледі.
