«Әділет» партиясының Іскерлік кеңесі алаңында партия төрағасы Айбек Дәдебай тау-кен металлургия кешені кәсіпорындарының басшыларымен, мемлекеттік органдар мен салалық қауымдастық өкілдерімен кездесті. Жиында саланы дамыту, отандық өндірісті қолдау, жаңа кәсіпорындар ашу, шикізатты терең өңдеу және инженерлік кадрлар даярлау мәселелері талқыланды.
Кездесу барысында Айбек Дәдебай Қазақстанның минералдық шикізат қорының мол екенін айтып, бұл әлеует ең алдымен ел экономикасының дамуына қызмет етуі тиіс екенін жеткізді. Оның сөзінше, жер қойнауындағы байлық халықтың әл-ауқатын арттыруға бағытталуы қажет. Осыған байланысты партия Президенттің шикізатты терең өңдеуді дамыту, жаңа өндіріс орындарын ашу және дайын өнім көлемін ұлғайту жөніндегі бастамаларын қолдайды.
Партия төрағасы табиғи ресурстарды пайдалану тәсілін өзгерту қажеттігін атап өтті. Оның айтуынша, шикізатты сыртқа шығарып, кейін сол өнімнің дайын түрін импорттау ел экономикасына тиімді емес. Сондықтан қосылған құны жоғары өнім өндіруге басымдық беру өнеркәсіп саясатының негізгі бағыттарының біріне айналуы тиіс.
Жиында келтірілген мәліметке сәйкес, өткен жылдың қорытындысында тау-кен металлургия кешені еліміздің жалпы ішкі өнімінің шамамен 8 пайызын қамтамасыз еткен. Өндірілген өнім көлемі 14 триллион теңгеден асып, экспорт көлемі 21,4 миллиард АҚШ долларына жеткен.
«Тау-Кен Самұрық» ұлттық тау-кен компаниясы» АҚ басқарма төрағасы Нариман Абсаметов сирек кездесетін минералдардың стратегиялық маңызы артып келе жатқанын атап өтті. Оның пікірінше, Қазақстандағы бірегей минералдық шикізат қорын тиімді пайдалану елдің әлемдік нарықтағы бәсекеге қабілеттілігін күшейтуге мүмкіндік береді.
Кездесу барысында сала өкілдері теміржол тасымалы, өндірісті жаңғырту, инвестиция тарту және кадр даярлау мәселелерін көтерді. Тау-кен өндіруші және тау-кен металлургия кәсіпорындарының республикалық қауымдастығының атқарушы директоры Николай Радостовец транзиттік тасымалдан түсетін кірістерді бөлудің тиімді тетіктерін қарастыруды ұсынды.
Ал «Қазақмыс корпорациясы» ЖШС басқарма төрағасы Руслан Өскенәлі саланың тұрақты дамуы мемлекет, бизнес және қоғам арасындағы өзара тиімді ынтымақтастыққа байланысты екенін айтты. Оның пікірінше, «Әділет» партиясының Іскерлік кеңесі өнеркәсіпті дамытуға бағытталған маңызды ұсыныстар әзірлейтін тиімді алаңға айналады.
Өз кезегінде «Qarmet» АҚ басшысы Вадим Басин кәсіпорында жүргізіліп жатқан жаңғырту жұмыстары туралы айтып, өндірісті дамыту үшін қауіпсіздікке, еңбек жағдайын жақсартуға және кәсіби кадрларға инвестиция салудың маңызын атап өтті.
Кездесу қорытындысында Айбек Дәдебай Іскерлік кеңесте айтылған барлық ұсыныстар жүйеленіп, «Әділет» партиясының тау-кен металлургия кешенін дамытуға арналған бірыңғай бастамалар топтамасына енгізілетінін мәлімдеді. Оның айтуынша, құжат бизнес өкілдері, салалық қауымдастықтар мен сарапшылардың ұсыныстары негізінде әзірленеді.
