Жаңа жылдың алғашқы күндері, атап айтқанда қаңтардың үші күні сағат 12.55 -те Үржар ауылындағы орталық аурухананың жылу қазандығы жарылып, жұртты әбігерге салған. Бір қабатты ғимараттың бір жақ қабырғасы мен төбенің бетон жабыны құлаған. Айтып келмейтін апатты қалпына келтіру үшін орталықтағы барлық резервтер жұмылдырылып, 4 қаңтар күні кешкі сағат 16.30-да жылу қазандығы іске қосылды. Жылдам әрі жұмыла кіріскен аудандағы бөлім, сала мамандары төтенше жағдайдың бетін тез арада қайтарды. Шұғыл қимылдаған іс-шаралардың нәтижесінде сол күні қас қарая ауруханадағы барлық бөлмелерге жылу келді. Адам шығыны жоқ. Ауруханадағы емделуші науқастар да, медициналық қызметкерлер де дін аман. От жағушы азаматтың арқасы мен беті 2 –дәрежелі күйікке шалынып, аудандық аурухананың хирургия бөлімінде емделуде. Төтенше жағдайды ауыздықтау үшін 15 техника бірлігі мен 80 азамат жұмылдырылды. Қазір аурухананың жылу қазандығы толық қуатында жұмыс жасап тұр.
Үржар ауданы әкімінің баспасөз орталығы
