Биылғы 2015 жылғы Ұлттық бірыңғай тестілеу жүйесі өзгеріссіз қалады. Десек те бұрынғы жылдарға қарағанда шамалы айырмашылықтар да бар. Атап айтсақ, ҰБТ нәтижесі құпия ақпарат ретінде сақталмақ. Ал оны тек жеке идентификациялық номер арқылы ғана білуге болады.
{jcomments on}ҚР Білім және ғылым министрлігінің ақпаратына сүйенсек, ҰБТ байырғы форматта өткізіледі, алайда қазіргі жүйені жетілдіру жұмыстары жүргізіліп жатыр. Мәселен, тестілеу жалпы білім беретін мектеп бағдарламасы аясында тексеруге жіберілетін болады. Ағымдағы жылы да түлектер дәл бұрынғысынша, 5 пән бойынша, қазақ немесе орыс тілдері арқылы ҰБТ сынағынан өткізілмек. Әр пәнде 25 сұрақтан бар. Ал емтихан тапсыруға 3,5 сағат (210 мин.) берілген.
— Сондай-ақ Ұлттық бірыңғай тестілеу биылдан бастап құпия ақпараттар қатарына жатқызылатын болады. Яғни тиісті балл алған түлектердің қорытындысын ғаламтор арқылы анықтауға болады. Оның өзінде де қажетті ЖСН цифрлары мен тестілеуден өтушінің жеке кодын теріп енгізу арқылы ғана таныса аласыз. Бұл код түлекке тестілеуге қатысар алдында беріледі. Ал деректер www.testcenter.kz атты Ұлттық тестілеу орталығының арнайы сайтына орналастырылады, — дейді бұл туралы пікір білдірген Ұлттық бірыңғай тестілеу орталығының Шәкәрім мемлекеттік университетіндегі базалық филиалының жетекшісі Болатбек Көжебаев.
Жуырда Б. Жанахаметұлы бастаған құрамында психологтар бар арнайы топ ауылды жерлерде болып, мектеп бітіруші түлектерге тест тапсырудың жай-күйі, ерекшеліктері туралы түсіндіру жұмыстарын жүргізіп қайтыпты. Жалпы, бұл ретте тек емтихан тапсырушыға ғана емес, олардың ата-аналарына да өзіндік жауапкершілік жүктеледі. Басты мәселе – жасөспірімге моральдық тұрғыдан демеу болып, емтихан алдында қобалжуына жол бермеген жөн.
Маманның келтірген деректерінен биылғы ҰБТ қорытындысын анықтау жайлы тағы бір тың ақпаратқа қанықтық. Айта кетер жайт — бағалау жүйесі шамалы өзгермек. Анығырақ айтсақ, түлек бағасы ҰБТ қорытындыларындағы жалпы балл мен оқушының жылдық бағасының қосындысынан тұратын болады. Мысал келтіре кетсек, егер түлек 11-сыныпқа дейін үздік бағаға оқып, ҰБТ-да пәндерден төмен балл алып қалса, онда аттестатына төмен баға емес, орташа баға қойылмақ. Дәл сол сияқты мектепте төмен бағаға оқыған түлек ҰБТ-да пәндерден жоғары балл алса, онда аттестатына жоғары емес, орташа баға қойылады.
Бүгінгі таңда Семей қаласындағы жүргізіліп жатқан ҰБТ-ға даярлық жұмыстарына келер болсақ, биылғы емтихан екі пунктте, нақтырақ айтсақ, № 836 Шәкәрім атындағы мемлекеттік университетінің Е.Қашаған көшесіндегі корпусы мен № 862 Қаз ИГЗУ-дің Шмидт көшесі 44 мекенжайындағы оқу корпусында өткізілмек. Қалалық білім бөлімінің мәліметіне сүйенсек, ҰБТ өткізілетін орындар толық даярланған. Ғимараттар вентиляциялық жүйеге қосылған, санитарлық-гигиеналық талаптарға сай. Сонымен қатар барлық аудиторияларда бейнебақылау камералары мен ұялы телефон өрісін өшіретін қондырғы қойылған.
Ағымдағы 2014-2015 оқу жылында мектептер бойынша 18, білім бөлімі бойынша 7 рет бақылау тесті алынып, орташа балл 72 болды. Дегенмен оқу жылының соңында түлектер даярлығы күрт артатыны белгілі. Ендеше, аталмыш көрсеткіш әлі де жоғарылауы мүмкін деген сөз. Ал қазіргі күні үміткерлерді Ұлттық бірыңғай тестілеу сынағына даярлау жұмыстары тыңғылықты түрде жалғасып жатыр.
Қуаныш ЖОЛЫМБЕТ, «Семей таңы»
